కన్నడ చిత్రం 'కాంతార' మూవీ టీమ్కు సుప్రీం కోర్టు ఊరట కలిగించింది. 'వరాహ రూపం..' పాటను ప్రదర్శించకూడదని కేరళ హైకోర్టు విధించిన షరతును సుప్రీంకోర్టు శుక్రవారం తోసిపుచ్చింది. చిత్ర నిర్మాతలు ఈ పాటను సినిమా నుంచి తొలగించాల్సిన అవసరం లేదని మధ్యంతర ఉత్తర్వుల్లో సుప్రీం కోర్టు పేర్కొంది. 'కాంతార' చిత్ర నిర్మాత విజయ్ కిరంగదూర్తో పాటు హీరో రిషబ్ శెట్టికి ముందస్తు బెయిల్ను మంజూరు చేసింది. అంతే కాకుండా కేసు విషయమై ఫిబ్రవరి 12, 13 తేదీల్లో వారిద్దరూ విచారణకు హాజరైనప్పుడు వారిని అరెస్టు చేయరాదని పోలీసులను కోర్టు ఆదేశించింది.
అసలేం జరిగిందంటే ?
తమ పాట బాణీని కాపీ కొట్టారంటూ కాంతర టీమ్పై కేరళకు చెందిన 'తైకుడం బ్రిడ్జ్' అనే మ్యూజిక్ బ్యాండ్ ఆరోపణలు చేసింది. అనంతరం కోర్టును ఆశ్రయించి 'వరాహ రూపం..' పాట ప్రదర్శనను నిలివేయాలని పిటిషన్ దాఖలు చేసింది. వారి కేసును పరిశీలించిన కోర్టు థియేటర్లలతో పాటు స్ట్రీమింగ్ ప్లాట్‌ఫామ్‌లలో పాటను ప్లే చేయడాన్నినిలిపివేయాలని మేకర్స్‌ను ఆదేశించింది. ఆ తర్వాత, కేరళలోని కోజికోడ్ జిల్లా న్యాయస్థానం అధికార పరిధి లేకపోవడంతో 'వరాహ రూపం' పాటపై నిషేధాన్నిఎత్తివేసింది.
కాగా, కన్నడ సినిమా 'కాంతార' రిలీజైన కొన్ని రోజుల్లోనే ప్రపంచవ్యాప్తంగా ఎన్నో ప్రశంసలు అందుకుంది. సినిమా ప్రేక్షకులను ఆద్యంతం ఆకట్టుకుంది. ఈ సినిమా విడుదలైన అన్ని భాషల్లోనూ బాక్సాఫీస్ వద్ద కలెక్షన్ల వర్షం కురిపించింది. ముఖ్యంగా మూవీలోని 'వరాహ రూపం..' సాంగ్ సినిమాకే హైలైట్గా నిలిచింది. థియేటర్లో ఈ పాట వచ్చినప్పుడు ప్రేక్షకులు తన్మయత్వంలో మునిగితేలారు. 'భూతకోలా' ఘట్టాన్ని స్వయంగా చూసిన అనుభూతి కలిగిందని అభిప్రాయపడ్డారు.
