Model Suicide: బంగాల్లోని కోల్కతాలో మోడల్స్ వరుస ఆత్మహత్యలు చర్చనీయాంశంగా మారాయి. ఇప్పటికే ముగ్గురు మోడల్స్ తమ అపార్ట్మెంట్స్లో ఆత్మహత్య చేసుకున్న ఘటనలు మరువక ముందే ఇప్పుడు మరో మోడల్ కూడా సూసైడ్ చేసుకున్నారు. కోల్కతా కస్బా ప్రాంతంలోని తన నివాసంలో ఆదివారం మోడల్ సరస్వతీ దాస్ విగతజీవిగా కనిపించారు.
సమాచారం అందుకున్న కస్బా పోలీస్ స్టేషన్ పోలీసులు ఘటనా స్థలానికి చేరుకున్నారు. మృతదేహాన్ని స్వాధీనం చేసుకుని పోస్టుమార్టం నిమిత్తం ఆసుపత్రికి తరలించారు. నివేదిక వచ్చిన తర్వాత మరణానికి కచ్చితమైన కారణం తెలుస్తుందని పోలీసులు తెలిపారు. మోడల్ మృతదేహంపై ఎలాంటి గాయాలు కనిపించలేదని, ఎలాంటి సూసైడ్ నోట్ లభించలేదని చెప్పారు. ఇప్పటివరకు 13 రోజుల్లో నలుగురు మోడల్స్ ఆత్మహత్యకు పాల్పడ్డారని పేర్కొన్నారు.
మోడలింగ్ రంగంలో సరస్వతి మంచి స్థాయికి ఎదగాలని కష్టపడిందని స్థానికులు చెబుతున్నారు. అందుకు తగ్గ ఫలితం లభించకపోవడం వల్ల గత కొన్ని రోజులుగా మానసిక కుంగుబాటులోకి వెళ్లిందని తెలిపారు. మానసిక కుంగుబాటుతో ఆత్మహత్య చేసుకుందా? లేక ఈ ఘటన వెనుక మరేదైనా కారణం ఉందా? అనే కోణంలో అధికారులు దర్యాప్తు ప్రారంభించారు.
ఇవీ చదవండి: 'సిద్ధూ మృతికి వారిదే బాధ్యత.. సిట్ దర్యాప్తు'
