ప్రకాశ్ అంబేడ్కర్... రాజ్యాంగ నిర్మాత బాబాసాహెబ్ అంబేడ్కర్ మనుమడు, భరీపా బహుజన్ మహాసంఘ్ పార్టీ అధినేత. మహారాష్ట్రలో ఈ పార్టీ ప్రభావం చాలా తక్కువ. బీబీఎమ్ మాత్రమే కాదు... మిగిలిన చిన్నపార్టీలదీ అదే తీరు. ఆ రాష్ట్ర రాజకీయం తిరిగేది భాజపా-శివసేన, కాంగ్రెస్-ఎన్సీపీ కూటముల చుట్టూనే.
సార్వత్రిక ఎన్నికల వేళ మాత్రం ప్రకాశ్ అంబేడ్కర్ పేరు బాగా వినిపిస్తోంది. బీబీపీ ఏర్పాటు చేసిన 'వంచిత్ బహుజన అఘాడీ'(వీబీఏ), ఏఐఎమ్ఐఎమ్ పార్టీల ఉమ్మడి అభ్యర్థిగా సోలాపుర్ లోక్సభ నియోజకవర్గం నుంచి పోటీకి దిగారు ప్రకాశ్. ఈ పరిణామం... ప్రధాన పార్టీలైన భాజపా, కాంగ్రెస్కు ముచ్చెమటలు పట్టిస్తోంది.
సోలాపుర్ విశేషాలు
భాజపా అభ్యర్థి : జైసిద్దేశ్వర్ శివాచార్య
కాంగ్రెస్ అభ్యర్థి : సుశీల్ కుమార్ శిందే
వీబీఏ-ఎంఐఎం అభ్యర్థి : ప్రకాశ్ అంబేడ్కర్
ఓటర్లు : 17,02,755
పోలింగ్ తేదీ : ఏప్రిల్ 18
ప్రధాన సమస్యలు : తాగునీరు, నిరుద్యోగం
సోలాపుర్... కాంగ్రెస్కు కంచుకోట. అక్కడ ఇప్పటివరకు జరిగిన 16 ఎన్నికల్లో 12 సార్లు కాంగ్రెస్ జయకేతనం ఎగురవేసింది.
లింగాయత్ ఓట్లపై భాజపా గురి...
కాంగ్రెస్ కంచుకోట అయినప్పటికీ... మోదీ ప్రభంజనంతో సోలాపుర్ 2014లో భాజపా వశమైంది. కేంద్ర మాజీ మంత్రి సుశీల్ కుమార్ శిందేపై లక్షన్నర ఓట్లతో గెలిచారు శరద్ బన్సోడే.
ప్రస్తుత పరిస్థితుల్లో బన్సోడే మరోసారి విజయం సాధించడం కష్టమని భావించింది భాజపా. ఆయన్ను పక్కనబెట్టింది. లింగాయత్ వర్గానికి చెందిన ఆధ్యాత్మిక గురువు మహాస్వామి జైసిద్ధేశ్వర్ శివాచార్యను రంగంలోకి దింపింది.
సానుకూలతలు...
⦁ సోలాపుర్లో 3 లక్షల 60 వేల లింగాయత్ ఓట్లున్నాయి. అవన్నీ గంపగుత్తగా శివాచార్యకే పడతాయని భాజపా నమ్మకం.
⦁ కన్నడ, మరాఠీ, హిందీ ఇలా మూడు భాషల్లో మాడ్లగలగటం వల్ల ఓటర్లకు దగ్గరయ్యే అవకాశం.
⦁ అగ్రవర్ణ మరాఠా ఓట్లు, పద్మశాలి ఓటు బ్యాంకుపై విశ్వాసం.
ప్రతికూలతలు...
⦁ కేంద్రంలో, రాష్ట్రంలో అధికారంలో ఉన్న భాజపాపై ప్రజా వ్యతిరేకత.
⦁ నిరుద్యోగం, తాగునీరు సమస్యలతో ఇబ్బంది పడుతున్న ప్రజలు అధికార భాజపాకు మళ్లీ ఓటు వేస్తారా అనేది అనుమానమే.
⦁ మైనార్టీ, ఎస్సీల ఓట్లు సిద్ధేశ్వర్ గెలుపుపై ప్రభావం చూపే అవకాశం ఉంది.
పునర్వైభవం కోసం....
సోలాపుర్ నుంచి మూడు సార్లు సుశీల్ కుమార్ శిందే గెలిచారు. నాలుగోసారి విజయమే లక్ష్యంగా బరిలోకి దిగారు. రాష్ట్ర ముఖ్యమంత్రిగా, కేంద్ర మంత్రిగా పనిచేసిన అనుభవం ఆయన సొంతం.
సానుకూలతలు...
⦁ సిట్టింగ్ ఎంపీ శరద్ బన్సోడేకు భాజపా ఈసారి టికెట్ ఇవ్వలేదు. ఆయన పార్టీకి వ్యతిరేకంగా పనిచేస్తే శిందేకు కలిసొచ్చే అవకాశం.
⦁ వెనుకబడిన వర్గానికి చెందడం వల్ల శిందేకు గ్రామీణ ప్రాంతాల్లో ఓటు బ్యాంకు బలంగా ఉంది.
⦁ మరాఠా ఓటర్లు ఈసారి కాంగ్రెస్ వైపు మొగ్గు చూపే అవకాశం.
⦁ 56 పార్టీలతో ఏర్పడిన మహాకూటమి మద్దతు.
⦁ సోలాపుర్ లోక్సభ నియోజకవర్గం పరిధిలోని సోలాపుర్ సిటీ సెంట్రల్ శాసనసభ స్థానానికి శిందే కుమార్తె ప్రణీతి ప్రాతినిధ్యం వహిస్తున్నారు. ఆమెకు ఉన్న మంచి పేరు శిందేకు కలిసొచ్చే అవకాశముంది.
ప్రతికూలతలు...
⦁ పట్టణ ప్రాంతంలో లింగాయత్, ముస్లిం, ఎస్సీల జనాభా ఎక్కువ. వీరి ఓట్లు శిందేకు పడటం కష్టం.
దిగ్గజాలతో ఢీ....
సోలాపుర్తో పాటు అకోలా పార్లమెంటు స్థానంలోనూ పోటీ చేస్తున్నారు ప్రకాశ్ అంబేడ్కర్.
సానుకూలతలు...
⦁ చిన్న పార్టీలను ఏకతాటిపైకి తేవడం.
⦁ 2.5 లక్షల ఎస్సీ ఓట్లు, 3 లక్షల ధన్గర్ ఓట్లు, 3 లక్షల మైనార్టీల ఓట్లు, 3.5లక్షల మరాఠా ఓట్లు తమకే పడతాయని నమ్మకం.
⦁ మజ్లిస్తో పొత్తు వల్ల మైనార్టీ ఓట్లు పడే అవకాశం.
ప్రతికూలతలు...
⦁ సొంత నియోజకవర్గం కాకపోవడం.
⦁ మైనార్టీ ఓట్లు కాంగ్రెస్ను కాదని అంబేడ్కర్ వైపు మొగ్గు చూపుతాయా అనేది అనుమానమే.
⦁ ప్రధాన పార్టీలతో పోరు కావడం వల్ల వారికి పడే సంప్రదాయ ఓట్లతో ఇబ్బంది.
ప్రకాశ్ అంబేడ్కర్ ఎవరి ఓట్లు ఏ స్థాయిలో చీల్చుతారన్నదే ఇప్పుడు ప్రశ్న. సమాధానం మే 23న తెలుస్తుంది.
- ఇదీ చూడండి: ఎక్కువ మంది నేరచరితులు, కోటీశ్వరులే
