ప్రేమించిన యువతిని మోసం చేయడమే కాకుండా.. ఆమెను నిర్బంధించి చిత్రహింసలకు గురిచేశాడు ఓ ప్రేమికుడు. ఈ ఘటన ఆంధ్రప్రదేశ్లోని పశ్చిమగోదావరి జిల్లా నవుడూరులో జరిగింది.
ఎక్కడ జరిగింది.. ఎలా జరిగింది!
బెంగళూరు టు వెస్ట్ గోదావరి. అక్కడ మొదలైన ప్రేమకథ.. చివరికి గోదారి గట్టున మోసపూరితమని తేలిపోయింది. పశ్చిమ గోదావరి జిల్లా వీరవాసరం మండలం నవుడూరుకు చెందిన రమేశ్.. కర్ణాటక రాజధాని బెంగళూరులో సాఫ్ట్ వేర్ ఉద్యోగిగా పని చేసేవాడు. అక్కడే ఓ యువతిని ప్రేమించాడు. కరోనా వ్యాప్తితో బెంగళూరులో ఉండలేని పరిస్థితుల్లో.. తన స్వగ్రామానికి చేరుకున్నాడు. అనంతరం.. ఏం జరిగిందో కానీ.. తన బంధువుల అమ్మాయిని పెళ్లి చేసుకున్నాడు. రమేశ్ వ్యవహారం.. బెంగళూరులో ఉన్న ప్రేమికురాలికి తెలిసింది. అక్కడి నుంచి ఈ నెల 4న ప్రియుడి ఇంటిని వెతుక్కుంటూ.. నవుడూరుకు చేరింది. తనను మోసం చేసినందుకు రమేశ్తో పాటు.. అతని తల్లిదండ్రులనూ నిలదీసింది.
రాజీ యత్నం విఫలమై... కిడ్నాప్!
తన ప్రేమికురాలు ఇంత పట్టుబడుతుందని ఊహించని రమేశ్.. చివరికి ఆమెను నిర్బంధించాడు. ఆ నోటా ఈ నోటా.. ఈ విషయం బయటకు వచ్చింది. స్థానికుల నుంచి పోలీసులకు సమాచారం వెళ్లింది. ఈ విషయం తెలుసుకున్న రమేశ్.. తన స్నేహితుడి సహాయం తీసుకుని.. ఆ అమ్మాయిని మరో ప్రాంతానికి తరలించాడు. అక్కడి నుంచి ఆమెను బయటకు వెళ్లకుండా నిర్బంధించాడు. మానసికంగా హింసించాడు. బెదిరించాడు. తాను బెంగళూరు వెళ్లిపోయినట్టుగా.. ఆ అమ్మాయితోనే ఫోన్లో పోలీసులకు చెప్పించి.. వారిని తప్పుదోవ పట్టించాడు.
చివరికి...
ఈ వ్యవహారంపై పూర్తి స్థాయిలో విచారణ చేసిన పోలీసులు... బెంగళూరు నుంచి వచ్చిన యువతి ఇంకా రమేశ్ చెరలోనే ఉందని తెలుసుకున్నారు. నిర్బంధం నుంచి కాపాడారు. ప్రేమ పేరుతో నమ్మించి చివరికి తన కోసం వచ్చిన యువతిని ఇంతగా హింసించిన రమేశ్ పోలీసులకు చిక్కాడు. అతనితో పాటు ఈ కిడ్నాప్ వ్యవహారానికి సహకరించిన అతని స్నేహితుడు, రమేశ్ కుటుంబ సభ్యులపై కేసు నమోదు చేశారు. ఘటనకు సంబంధించి పూర్తి వివరాలపై దర్యాప్తు చేస్తున్నారు.
ఇదీ చదవండి: kidnap case: కుమారుడిలా ఉన్నాడని కిడ్నాప్.. 4 నెలల తర్వాత అరెస్ట్
