సికింద్రాబాద్.. తిరుమలగిరి పోలీస్‌స్టేషన్ పరిధిలో దారుణం జరిగింది. యువతిని పెళ్లి చేసుకుంటానని మాయమాటలు చెప్పి నిహాల్ సింగ్ అనే యువకుడు పలుమార్లు లైంగిక వాంఛ తీర్చుకున్నాడు. చివరికి యువతిని పెళ్లి చేసుకోనని ముఖం చాటేయడంతో... బాధిత యువతి కుటుంబ సభ్యులతో కలిసి పోలీసులను ఆశ్రయించింది.
పోలీసుల కథనం ప్రకారం.. అత్తాపూర్ కిషన్ బాగ్ ప్రాంతానికి చెందిన నిహాల్ సింగ్ యువతిని ప్రేమిస్తున్నానని నమ్మించి ఆమె వెంట పడి ప్రేమలోకి దించాడు. అత్తాపూర్‌లోని చిన్నమ్మ నివాసానికి యువతి వచ్చినప్పుడల్లా ఆమెతో సన్నిహితంగా మెలిగి మాయమాటలతో లోబరుచుకున్నాడు. పెళ్లి చేసుకుంటానని నమ్మించడంతో యువతి అతనితో శారీరకంగా దగ్గరైంది. 2017 నుంచి అనేకసార్లు యువతితో హోటల్లో కలుస్తూ ఉండేవాడు.
పెళ్లి చేసుకోవడానికి నిహాల్‌సింగ్‌ ముఖం చాటేయడమే కాకుండా యువతికి జరిగిన నిశ్చితార్థాన్ని కూడా రద్దు చేయించాడు. తన దగ్గరున్న వీడియోలు, ఫొటోలు బయటపెడతానని మరోసారి యువతిని లొంగదీసుకున్నాడు. ఈ క్రమంలోనే యువతి గర్భం దాల్చిన విషయం ఇంట్లో వాళ్లకి తెలిసింది. నిహాల్ విషయం తెలుసుకున్న యువతి కుటుంబ సభ్యులు అతడితో పెళ్లికి ఒప్పుకున్నారు. కానీ నిహాల్ కుటుంబ సభ్యులు దీనికి అంగీకరించలేదు. ఆమెను పెళ్లికి నిహాల్ ససేమిరా అన్నాడు. ఏం చేయాలో పాలుపోని యువతి తల్లి తిరుమలగిరి పోలీసులకు ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేస్తున్నారు.
