sisters died in road accident: అసలే మద్యం మత్తు.. ఆపై అతివేగం.. వెరసి రెండు నిండు ప్రాణాలు బలవగా... మరో అమ్మాయి చావుబతుకుల మధ్య కొట్టుమిట్టాడుతోంది. రంగారెడ్డి జిల్లా మొయినాబాద్ మండలం రెడ్డిపల్లి గ్రామానికి చెందిన ఉపాధ్యాయుడు మోరె లక్షణ్‌ మండల కేంద్రంలో నివాసముంటున్నారు. ఈయన పెద్ద కుమార్తె సౌమ్య మెహిదీపట్నంలో డిగ్రీ చదువుతుండగా చిన్నకుమార్తె ప్రేమిక ఎన్టీఆర్ మోడల్‌ స్కూల్‌లో చదువుతోంది. లక్ష్మణ్‌ సోదరుడు రెడ్డిపల్లి ఎంపీటీసీ అయిన శ్రీనివాస్‌ కుమార్తె అక్షయతో కలిసి సౌమ్య, ప్రేమికలు శనివారం రాత్రి ద్విచక్రవాహనంపై బయటికి వెళ్లారు. కనకమామిడి వీరు వెళ్తుండగా బీజాపూర్‌ రహదారిపై చేవెళ్ల నుంచి హైదరాబాద్‌ వైపు వేగంగా వచ్చిన కారు ద్విచక్రవాహనాన్ని బలంగా ఢీకొట్టింది. ఈ ప్రమాదంలో ప్రేమిక అక్కడికక్కడే ప్రాణాలు కోల్పోయింది. తీవ్రంగా గాయపడిన సౌమ్య, అక్షయలను ఆస్పత్రికి తరలించారు.
చావు ముంగిట మరో యువతి
road accident on bijapur highway: పరిస్థితి విషమించటంతో ఇద్దరు అమ్మాయిలను హైదరాబాద్‌లోని ఆస్పత్రికి తరలించగా... చికిత్స పొందుతూ ఇవాళ సౌమ్య చనిపోయింది. తీవ్రగాయాలపాలైన అక్షయకు చికిత్స అందిస్తున్నారు. ఒకే కుటుంబానికి చెందిన ముగ్గురు అమ్మాయిల్లో ఇద్దరు అక్కాచెల్లెళ్లు చనిపోగా... మరో యువతి ప్రాణాలు కొట్టుమిట్టాడుతుండటంతో వారి స్వగ్రామంలో విషాదఛాయలు అలుముకున్నాయి. పిల్లల మృతితో ఆ కుటుంబసభ్యుల రోదనలు మిన్నంటాయి. కాగా ప్రమాదానికి కారణమైన కారును నడుపుతున్న వ్యక్తి మద్యం మత్తులో ఉన్నట్లు పోలీసులు గుర్తించారు. అప్పటికే మద్యం సేవించటం ఆపై అతివేగంగా కారు నడపటమే ప్రమాదానికి కారణంగా పోలీసులు చెబుతున్నారు.
