పేగు బంధం కూడా మార్కెట్‌ సరకవుతోంది. కన్నబిడ్డను అమ్మేసి, వచ్చిన డబ్బును పంచుకుని, తమ బంధాన్ని తెంచుకుందామనుకున్న ఓ జంట తీరు నివ్వెర పరిచింది. ఇవీ వివరాలు... ఏపీలోని రాజమహేంద్రవరానికి చెందిన రారాజుకు భార్య, ఇద్దరు పిల్లలు ఉన్నారు. అతను వారిని వదిలేసి ఒంటరిగా ఉంటూ ల్యాబ్‌ టెక్నీషియన్‌గా పనిచేస్తున్నాడు. కాకినాడకు చెందిన కె.వసంతకు గతంలో బాల్య వివాహమై, రద్దయింది. ప్రస్తుతం మేజర్‌ అయిన ఆమె రాజమహేంద్రవరంలోని ఒక బైక్‌ షోరూంలో పనిచేస్తోంది. ఈ క్రమంలో వసంతను రారాజు ప్రేమ వివాహం చేసుకున్నాడు. వీరికి నాలుగు నెలల కుమారుడు ఉన్నాడు. నెల రోజులుగా రారాజు... తన తండ్రి ప్రసాద్‌, వసంతలతో కలిసి ద్వారకా తిరుమలలో ఉంటున్నాడు. అయితే జంట మధ్య తరచూ గొడవలు జరుగుతుండటంతో కుమారుడిని విక్రయించి, వచ్చిన డబ్బును పంచుకుని విడిపోవాలని నిర్ణయించుకున్నారు.
భీమవరానికి చెందిన ఒక వ్యక్తికి చిన్నారిని అమ్మేందుకు బేరం పెట్టారు. ఈ మేరకు గురువారం రారాజు, వసంత, ప్రసాద్‌లు ద్వారకా తిరుమల కొండపైనున్న ఒక కాటేజీ వద్దకు వెళ్లారు. భీమవరం వాసి కూడా అక్కడికి చేరుకున్నారు. రూ.2 లక్షలకు ఇచ్చేద్దామని రారాజు, రూ.10 లక్షలకు ఇద్దామని ప్రసాద్‌ గొడవ పడ్డారు. విషయం తెలుసుకున్న భక్తులు, ఆలయ సెక్యూరిటీ సిబ్బంది పోలీసులకు సమాచారం అందించారు. వెంటనే భీమవరం వాసి పరారయ్యారు. పోలీసులు చేరుకుని చిన్నారితోపాటు రారాజు, వసంత, ప్రసాద్‌లను ఠాణాకు తరలించారు.
ఇవీ చదవండి:
