భూవివాదంలో జరిగిన దాడిలో ఒకరు మృతి చెందగా మరొకరికి తీవ్ర గాయాలయ్యాయి. ఇరువర్గాల మధ్య గొడవ ఈ హత్యకు కారణమైంది. జగిత్యాల గ్రామీణ మండలం సంగంపల్లిలో కర్రతో దాడి చేయగా ఓ వ్యక్తి అక్కడికక్కడే మృతి చెందాడు. గ్రామానికి చెందిన జాలపల్లి రవి, అతని భార్య మల్లవ్వపై.. అదే గ్రామానికి చెందిన పత్తిపాక బాపన్న కర్రతో దాడి చేశాడు. ఈ దాడిలో రవి అక్కడికక్కడే మృతి చెందగా ఆయన భార్య మల్లవ్వకు తీవ్ర గాయాలయ్యాయి.
స్థానికులు వెంటనే ఆమెను కరీంనగర్ ప్రభుత్వ ఆస్పత్రికి తరలించారు. కొన్ని రోజులుగా ఇంటి దారి విషయంలోనూ ఇరువురి మధ్య గొడవలు జరుగుతున్నాయి. ఈ నేపథ్యంలోనే ఇరువురి మధ్య గొడవ జరిగింది. ఘటనపై సమాచారం అందుకున్న జగిత్యాల రూరల్ పోలీసులు కేసు నమోదు చేసి దర్యాప్తు చేస్తున్నారు.
