Loan APP: ఓ యువతికి అసభ్య చిత్రాలు పంపించి వేధించిన లోన్యాప్ ప్రతినిధిని హైదరాబాద్ సైబర్ క్రైం పోలీసులు అరెస్ట్ చేశారు. హైదరాబాద్కు చెందిన యువతి లోన్యాప్లో రుణం తీసుకున్నారు. ఆర్థిక ఇబ్బందుల వల్ల సకాలంలో కిస్తీలు చెల్లించలేకపోయింది. యువతి చరవాణికి అసభ్య సందేశాలతో పాటు ఆమె ఫొటోను మార్ఫింగ్ చేసిన నగ్న చిత్రాలు వచ్చాయి. బాధితురాలు హైదరాబాద్ సైబర్ క్రైం పోలీసులకు ఫిర్యాదు చేయడంతో కేసు నమోదు చేసి దర్యాప్తు చేపట్టారు. సాంకేతిక పరిజ్ఞానాన్ని ఉపయోగించుకొని నిందితుడి బిహార్లోని సివాన్ జిల్లా గోపాల్పూర్ కోఠిలో ఉన్నట్లు తెలుసుకున్న సైబర్ క్రైం పోలీసులు అక్కడికి వెళ్లారు. మనీష్ కుమార్ను అరెస్ట్ చేసి హైదరాబాద్ తీసుకొచ్చి నాంపల్లి కోర్టులో హాజరుపర్చి రిమాండ్కు తరలించారు.
ఈ కేసులో వికాస్ కుమార్ అనే లోన్యాప్ నిర్వాహకుడు పరారీలో ఉన్నట్లు సైబర్ క్రైం పోలీసులు తెలిపారు. కిస్తీలు సకాలంలో చెల్లించని వాళ్ల ఆధార్, పాన్ కార్డు, ఫొటోను వికాస్... మనీష్కు పంపిస్తున్నట్లు పోలీసుల దర్యాప్తులో తేలింది. కిస్తీలు చెల్లించేలా రుణగ్రహీతలపై ఒత్తిడి తెచ్చేందుకు మనీష్.. అసభ్య సందేశాలు పంపడంతో పాటు రుణగ్రహీతల ఫొటోలను మార్ఫింగ్ చేసి నగ్నచిత్రాలు రూపొందిస్తున్నట్లు సైబర్ క్రైం పోలీసులు తేల్చారు. అసభ్య చిత్రాలను రుణగ్రహీత ఫోన్లో ఉన్న బంధువులు, స్నేహితులు, కుటుంబ సబ్యుల నెంబర్లను ఎంపిక చేసుకొని వాళ్ల మొబైల్ ఫోన్లకు మనీష్ పంపిస్తున్నాడు. పరారీలో ఉన్న వికాస్ కోసం పోలీసులు గాలిస్తున్నారు.
ఇవీ చదవండి:
