వరంగల్ అర్బన్ జిల్లా కాజీపేట్ రైల్వే క్వార్టర్స్లో దారుణం జరిగింది. కసాయి భర్త కట్టుకున్న భార్యనే అంతమొందించాడు. క్షణికావేశంలో జరిగిన ఘటనతో ఇద్దరు చిన్నారులు అమ్మప్రేమకు దూరమయ్యారు. తల్లి మృతితో మిన్నంటిన కుమారుల రోదనలు చూపరులను కంటతడి పెట్టించాయి.
కాజీపేటకు చెందిన మేకల లక్ష్మి రైల్వేలో ఉద్యోగం చేస్తూ అక్కడే క్వార్టర్స్లో నివాసముంటోంది. ఆమె కుమారుడు శ్రీనివాస్, కోడలు రమ, ఇద్దరు మనవళ్లు లక్ష్మి వద్దే ఉంటున్నారు. శ్రీనివాస్కు భార్యతో సాయంత్రం ఇంట్లో గొడవ జరగగా క్షణికావేశంలో రమను కత్తితో గొంతులో పొడిచాడు. రక్తం కారుతుండగానే బయటకు పరుగెత్తుకొచ్చిన రమ అక్కడే కుప్పకూలిపోయింది. శ్రీనివాస్ ఎక్కువగా మద్యం సేవిస్తుంటాడని.. అతని మానసిక స్థితి కూడా సరిగా లేదని స్థానికులు చెబుతున్నారు.
హత్యపై సమాచారం అందుకున్న వరంగల్ సెంట్రల్ జోన్ డీసీపీ పుష్ప, హన్మకొండ ఏసీపీ జితేందర్ రెడ్డి ఘటనా స్థలాన్ని పరిశీలించారు. స్థానికులు, బంధువుల వద్ద నుంచి వివరాలు సేకరించారు. మృతురాలి సోదరుని ఫిర్యాదుతో కేసు నమోదు చేశామని పోలీసులు తెలిపారు. నిందితుడు ప్రస్తుతం పరారీలో ఉన్నాడు.
