యజమాని కోసం శునకం మౌనరోదన..

తన ఆకలి తీర్చి కంటికి రెప్పలా కాపాడుకుంటున్న యజమాని చలనం లేకుండా పడి ఉండడం చూసి ఆ మూగజీవి తట్టుకోలేకపోయింది.. శాశ్వతంగా దూరమయ్యాడని అనుకుందేమో మృతదేహం వద్ద నుంచి కదలకుండా మౌనంగా రోదించింది ఆ శునకం. మాటలే వచ్చి ఉంటే బోరున విలపించేదేమో.. ఇలా గంటలకొద్దీ ఘటన స్థలంలోనే ఉండడం చూసి మూగజీవి ప్రేమకు విలువ కట్టలేమంటూ కన్నీరుమున్నీరయ్యారు అక్కడికి వచ్చినవారు.

కుమురంభీం ఆసిఫాబాద్ జిల్లా సిర్పూర్‌ మండలం కాకడ్‌బొడ్డికి చెందిన ఆత్రంభీం... సంభాజిగూడెంలో వ్యవసాయ పనులు చేస్తున్నాడు. ఈ క్రమంలో పొలంలో విద్యుదాఘాతానికి గురైన భీం.. అక్కడే కుప్పకూలిపోయాడు.

దీనిని గమనించిన అతని పెంపుడు కుక్క... యజమానిని తట్టిలేపేందుకు శతవిధాలుగా ప్రయత్నించింది. భీం ఎంతకూ కళ్లు తెరవకపోవటంతో.... మృతదేహం చుట్టే తిరుగుతూ, మౌనంగా రోదించింది. ఈ ఘటన అక్కడున్న వారి కళ్లు చెమర్చేలా చేసింది.

• ఇదీ చదవండి : మౌలిక వసతుల్లో తడ'బడి'.. సంక్షోభంలో విద్యావ్యవస్థ!