Gold Theft Case: నమ్మించి 3 కేజీల విలువైన బంగారం ఆభరణాలతో ఉడాయించిన ఇద్దరు వ్యక్తులపై ఏపీ విజయవాడలోని కొత్తపేట పోలీసులు నమోదు చేశారు. కొత్తపేట కోమల విలాస్ సెంటరులోని ఎస్ఎస్ టవర్స్లో రాజస్థాన్కు చెందిన సునీల్ కుమార్ నివాసముంటున్నారు. ముంబైకి చెందిన జైమాతాది కార్గో ప్రైవేటు లిమిటెడ్ నుంచి ఫ్రాంచైజీ తీసుకొని "జైమాతాది లాజిస్టిక్స్" అనే పేరుతో 5 ఏళ్లుగా కొరియర్ సర్వీసు నిర్వహిస్తున్నారు. ముంబై నుంచి కొరియర్ ద్వారా వచ్చిన బంగారు ఆభరణాలు, డైమండ్స్ను రాష్ట్రంలోని పలు ప్రాంతాలకు డెలివరీ చేస్తుంటారు. ఇందుకుగానూ.. సునీల్ కుమార్కు కమిషన్ వస్తుంది. ఈ డెలివరీ కోసం.. సునీల్ కుమార్ పలువురు బాయ్స్ ను పనిలో పెట్టుకున్నారు. అతని వద్ద పనిచేస్తున్న ఇద్దరు వ్యక్తులు.. బంగారం డెలివరీ చేసేందుకు వెళ్లి.. అట్నుంచి ఉడాయించారు.
ఈనెల 7న ముంబై నుంచి గన్నవరం ఎయిర్పోర్టుకు వచ్చిన కార్గో విమానం నుంచి ఆభరణాల తాలూకు బాక్సులను యజమాని తీసుకెళ్లాడు. అనంతరం.. ఆ ఆభరణాలను ప్రాంతాల వారీగా డెలివరీ చేసేందుకు విడి విడిగా ప్రత్యేక బాక్సుల్లో ప్యాకింగ్ చేయించారు. అందులో కొన్ని బాక్సులను డెలివరీ బాయ్స్.. రాజీవ్ శర్మ, భవానీసింగ్ అప్పగించి డెలివరీ చేసేందుకు ఈ నెల 8వ తేదీన పంపారు.
ఉదయం వాళ్లను రైలు ఎక్కించిన ఓనర్ సునీల్ కుమార్.. మధ్యలో ఫోన్లు చేస్తూ వాకబు చేస్తూ ఉన్నాడు. కొంత సమయం తరువాత డెలివరీ బాయ్స్ ఫోన్లు స్విచ్ఛాఫ్ వచ్చాయి. ఆభరణాలు డెలివరీ తీసుకోవాల్సిన షాపుల వారికి ఫోన్లు చేస్తే రాలేదని సమాధానం వచ్చింది. దీంతో ఆ ఇద్దరు ఆభరణాలతో ఉడాయించినట్లుగా భావించిన యజమాని.. పోలీసులను ఆశ్రయించాడు. సుమారుగా రూ.1.5 కోట్లు విలువైన 3 కేజీల ఆభరణాలతో పారిపోయారని ఫిర్యాదులో పేర్కొన్నారు. ఈ మేరకు కేసు నమోదు చేసిన పోలీసులు దర్యాప్తు చేపట్టారు.
ఇదీ చదవండి: సాఫ్ట్‌వేర్‌ ఇంజినీర్‌ నారాయణరెడ్డి హత్య కేసును ఛేదించిన పోలీసులు
