ఏపీలోని కృష్ణా జిల్లా మండవల్లి సబ్ రిజస్ట్రార్ కార్యాలయంలో ఒకే ఒక్క డాక్యుమెంట్‌ రైటర్ ఉన్నారు. ఆయనే స్థిరాస్తి లావాదేవీలు చూస్తారు. అందరూ ఆయన దగ్గరే దస్తావేజులు రాయించుకుంటారు. సబ్ రిజిస్ట్రార్‌ కార్యాలయంలోనూ పరిచయాలతో పనులు చేయిస్తుంటారు. మండవల్లి సబ్ రిజిస్ట్రార్‌ కార్యాలయంలో చాలా తక్కువ రిజిస్ట్రేషన్‌లు జరుగుతుంటాయి. ఏడాదికి ఇక్కడ ఆదాయమే రూ.9 కోట్లు ఉంటుంది. అలాంటిది ఒకే ఏడాది డాక్యుమెంటు రైటర్ ప్రభుత్వ ఆదాయానికి రూ.2.5కోట్లు గండి కొట్టారు. ప్రస్తుతం వసూలుకు అధికారులు మల్లగుల్లాలు పడుతున్నారు. దీనికి తోడు 258 మంది క్రయదారులు డాక్యుమెంట్‌ రైటర్ చుట్టూ తిరుగుతున్నారు. వీరందరికి నోటీసులు జారీ అయ్యాయి. పూర్తి స్థాయిలో స్టాంపు రుసుము చెల్లిస్తేనే ఆ డాక్యుమెంటు చెల్లుబాటు అవుతుంది. కానీ ప్రతి ఒక్కరూ కనీసం 10శాతం సొమ్ము కూడా చెల్లించలేదు. రూ.లక్ష చెల్లించాల్సిన వారి పేరుతో రూ.10 వేలు చొప్పున మాత్రమే చెల్లించి దాన్ని మార్ఫింగ్‌ చేసి నకిలీ ఈ చలానాను అప్‌లోడ్‌ చేశారు. సీఎఫ్‌ఎంఎస్‌ విదానంలో బురిడీ కొట్టించారు. ఈ విధంగా దాదాపు రూ.2.50 కోట్లు స్వాహా చేశారు.
దీనిలో క్రయదారుల పాత్ర లేకపోయినా ప్రస్తుతం బాధితులు వారే. డాక్యుమెంట్‌ రైటర్ చెల్లించకపోయినా ముందుగా దస్తావేజులు పొందిన యజమానులు ఈ రుసుము చెల్లించాల్సి ఉంటుంది. మండవల్లిలో రూ.19 లక్షలు మాత్రమే రికవరీ అయింది. ఇది కూడా భీమవరం ప్రాంతానికి చెందిన స్థిరాస్తి వ్యాపారులు చెల్లించారు. వారు వేసిన వెంచర్లలో విక్రయించిన స్థలాలకు సంబంధించి తగ్గిన స్టాంపు రసుము చెల్లించారు. డాక్యుమెంటు రైటర్ మేడేపల్లి బాలాజీపై పోలీసు కేసు నమోదు అయింది. కైకలూరు సీఐ పిలిపించి మాట్లాడారు. అయితే ప్రస్తుతం ఎక్కడ ఉంటున్నారో మాత్రం క్రయదారులకు సమాచారం లేదు. మండవల్లిలో మాత్రం కనిపించడం లేదని చెబుతున్నారు. డాక్యుమెంట్‌ రైటర్, ఆయన కుమారునికి సంబంధించి రొయ్యల చెరువులపై పోలీసులు ఆరా తీస్తున్నారు. కొన్ని స్థలాలు ఉన్నట్లు తెలిసింది. వీటిని అమ్మి సొమ్ములు చెల్లించాల్సి ఉంది. దీనికి గడువు ఇచ్చారు. ఈ విషయం మండవల్లిలో చర్చనీయాంశమైంది. ఒకేసారి కోట్లకు పడగలెత్తడమంటే ఇదేనేమో అని చర్చించుకుంటున్నారు.
రూ.1.22 కోట్లు చెల్లింపు!
పటమట సబ్ రిజిస్ట్రార్‌ కార్యాలయంలోనూ ఇద్దరు డాక్యుమెంట్‌ రైటర్లు రూ.1.22కోట్లు చెల్లించారు. ఇక్కడ పూర్తిగా చెల్లించడం విశేషం. కొన్నేళ్లుగా దస్తావేజుల లేఖర్లుగా గుర్తింపు పొందిన వీరు ఈ కుంభకోణం వెలుగు చూడడంతోనే మొత్తం చెల్లింపులు చేయడం గమనార్హం. వాస్తవానికి పటమట కేంద్రంగానే ఈ నకిలీ ఈ చలానా కుంభకోణం విస్తరించిందని చెబుతున్నారు. అన్ని రకాల అక్రమాలు పటమట కేంద్రంగా జరుగుతున్నట్లు ప్రచారం జరిగింది. మొత్తానికి జిల్లాలో రూ.4.2 కోట్లు రుసుము స్వాహా అయినట్లు పరిశీలనలో తేలగా ఇప్పటి వరకు రూ.1.86 కోట్లు చెల్లింపులు జరిపారు. ఒక్క మండవల్లి మినహా అన్ని సబ్ రిజిస్ట్రార్‌ కార్యాలయాల్లో పూర్తిస్థాయిలో జరిగాయి.
ఇద్దరిపై వేటు!
జిల్లాలో ఇద్దరు సబ్ రిజిస్ట్రార్లు, ఇద్దరు ఉద్యోగులపై వేటు పడింది. మండవల్లి, పటమట సబ్ రిజిస్ట్రార్లు సుబ్రహ్మణ్యం, పి.వెంకటేశ్వర్లును సస్పెండ్‌ చేస్తూ ప్రభుత్వం ఆదేశాలు జారీ చేసింది. ఇక్కడ భారీగా సొమ్ము స్వాహా కావడంతో విధుల్లో అలసత్వం కింద వీరిని సస్పెండ్‌ చేస్తూ ఉత్తర్వులు ఇచ్చారు. మండవల్లిలో కౌంటర్‌ను పర్యవేక్షించే షరాఫ్‌ను, పటమటలో జూనియర్‌ అసిస్టెంట్‌ సూర్యనారాయణను సస్పెండ్‌ చేశారు. వీరు డాక్యుమెంట్లను పూర్తి స్థాయిలో పరిశీలించి సబ్ రిజిస్ట్రార్‌కు నివేదించాల్సి ఉంటుంది. జిల్లాలో మొత్తం ఆరు ఎస్‌ఆర్‌ కార్యాలయాల్లో నకిలీ ఈ-చలానాలు వెలుగుచూశాయి. నందిగామలో రూ.350 మాత్రమే తక్కువ చెల్లించారు. ఇది పొరపాటున జరిగి ఉండవచ్చని భావించారు. కంకిపాడులో రూ.1.20లక్షలు, గాంధీనగర్‌లో రూ.70వేలు తక్కువ జమ అయింది. గాంధీనగర్‌లో కూడా పటమట నుంచి వచ్చిన డాక్యుమెంటుగా గుర్తించారు. గుణదలలో రూ.42.80లక్షలు స్వాహా చేసినా మొత్తం రికవరీ చేశారు. దీంతో అక్కడ సబ్ రిజిస్ట్రార్‌పై వేటు పడలేదు. పోలీసు స్టేషన్‌లో క్రిమినల్‌ కేసులు నమోదైనా ఎవరినీ అరెస్టు చేయకపోవడం గమనార్హం. పటమటలో దాదాపు 86 డాక్యుమెంట్లు తేడా వచ్చాయి. దాదాపు పది మంది డాక్యుమెంట్‌ రైటర్ల పాత్ర ఉంది. కానీ ఇద్దరిపై కేసు నమోదు అయింది. మిగిలిన వారిపై కేసు నమోదు చేయలేదు.
ఇదీ చూడండి: CYBER CRIME: పోలీసులు కౌన్సిలింగ్ ఇచ్చినా... రూ.5 కోట్లకు ఆశపడి 25లక్షలు పొగొట్టుకుంది!
