మద్యం మత్తులో వాహనం న‌డిపిన ఓ యువ‌కుడు రోడ్డు దాటుతున్న ఓ మహిళను ఢీకొట్టి ఆమె మృతికి కార‌ణ‌మ‌య్యాడు. ఈ ఘటన హైదరాబాద్లోని మాదాపూర్లో జరిగింది. విశాఖ‌ప‌ట్టణానికి చెందిన బి.రవిప్రకాష్ 15 రోజుల క్రితం న‌గ‌రానికి వ‌ల‌స వ‌చ్చి డీజే ఆపరేటర్గా విధులు నిర్వ‌హిస్తున్నాడు. కాగా సోమ‌వారం సాయంత్రం మద్యం సేవించిన రవిప్రకాష్ ద్విచక్రవాహనంపై కేపీహెచ్‌‌బీ నుంచి మాదాపూర్ అయ్య‌ప్ప‌సొసైటీ వైపు వ‌స్తున్నాడు. అదే స‌మ‌యంలో ర‌త్నావ‌త్ క‌విత(29) హౌస్‌కీపింగ్ విధులు ముగించుకుని ఇంటికి వెళ్లేందుకు మాదాపూర్లోని కార్వీ ఆఫీస్ ఎదుట రోడ్డు దాటుతుండగా... మద్యం మత్తులో బైక్‌పై వేగంగా వ‌స్తున్న రవిప్రకాష్ ఆమెను ఢీకొట్ట‌డంతో తీవ్ర గాయాలపాలైంది.
ఆమెను చికిత్స నిమిత్తం పేస్ హాస్పిట‌ల్ తరలించగా... చికిత్స పొందుతూ మృతి చెందింది. పోలీసులు ర‌విప్ర‌కాష్‌కు బ్రీత్ అన‌లైజ్ ప‌రీక్ష‌లు చేయ‌గా.. అతనికి 267 ఎంజీ/100ఎంఎల్ రీడింగ్ వచ్చిందని మాదాపూర్ సీఐ రవీంద్రప్రసాద్ తెలిపారు. రవిప్రకాష్పై కేసు నమోదు చేసి రిమాండ్కు తరలించినట్లు ఆయన వెల్లడించారు.
ఇదీ చదవండి: అడ్డు వస్తున్నాడని పసివాడి ప్రాణాలు తీశాడు
