యజమాని చిత్రహింసలు పెట్టాడని ఓ వ్యక్తి ఆత్మహత్య చేసుకున్నాడు. కర్నూలు జిల్లా డోన్ మండలం ఆవులదొడ్డి గ్రామానికి చెందిన అశోక్ మూడు రోజుల క్రితం సెల్ఫీ వీడియో తీసుకుంటూ పురుగుల మందు తాగి బలవన్మరణానికి యత్నించాడు. స్థానికులు అతన్ని డోన్ ప్రభుత్వ ఆస్పత్రికి తరలించారు. ప్రభుత్వాస్పత్రిలో మూడు రోజులుగా చికిత్స పొందుతున్న అశోక్ కోలుకోలేక బుధవారం మృతి చెందాడు. గత నాలుగేళ్లుగా ఓ కెమికల్ ఫ్యాక్టరీలో అశోక్ పని చేస్తున్నాడు. ఫ్యాక్టరీ యజమాని వేధింపులకు గురి చేశాడని సెల్ఫీ వీడియోలో ఆవేదన వ్యక్తం చేశాడు.
'నేను మందు తాగి చచ్చిపోతున్నా. దానికి కారణం మా సార్.. డ్యూటీలో నన్నే టార్గెట్ చేసి చేయకూడని పనులు చేయించుకుని.. బూతులు మాట్లాడి.. నన్ను టార్చర్ పెట్టేవాడు. అందుకనే.. మందుతాగి చచ్చిపోతున్నా..'- బాధితుడు.
అశోక్ మృతికి నిరసనగా కర్నూలు డోన్లో కెమికల్ ఫ్యాక్టరీ ముందు ప్రజా సంఘాలు ధర్నా నిర్వహించాయి. అశోక్ మృతికి కారణమైన కెమికల్ ఫ్యాక్టరీ మేనేజర్ శరత్, నిఖిల్ను అరెస్టు చేయాలని డిమాండ్ చేశారు. ఫ్యాక్టరీలో పనిచేసే కార్మికులపై కఠినంగాా వ్యవహరించడం సరికాదని వారు హెచ్చరించారు. కార్మికులను వేధించడం, ఒత్తిళ్లకు గురిచేసిన వారిపై క్రిమినల్ కేసు పెట్టాలన్నారు.
'మా కుమారుడి మరణానికి కారణమైన వారిని కఠినంగా శిక్షించాలి. అశోక్.. పైఅధికారులు అతనిని వేధింపులకు గురి చేసేవారు. ఫ్యాక్టరీ యజమాన్యం మా కుటుంబానికి న్యాయం చేయాలి' -అశోక్ తండ్రి
ఇదీ చదవండి: TOLLYWOOD DRUGS CASE: డ్రగ్స్‌ కేసులో ముమైత్ఖాన్ను ప్రశ్నిస్తున్న పోలీసులు
