ఏపీలోని తూర్పుగోదావరి నుంచి కర్ణాటకలోని బీదర్కు తరలిస్తున్న గంజాయిని రాచకొండ పోలీసులు హైదరాబాద్లో పట్టుకున్నారు. సరూర్నగర్ పీఎస్ పరిధిలోని కొత్తపేట్ వద్ద తనిఖీలు నిర్వహించారు. ఈ క్రమంలో ఎస్ఓటీ పోలీసులు.. బొలేరో వాహనంలో తరలిస్తున్న 320 కిలోల గంజాయిని స్వాధీనం చేసుకున్నారు. రాజ్కుమార్ అనే నిందితుణ్ని అరెస్ట్ చేశారు.
బీదర్కు చెందిన వ్యక్తులు..
బీదర్కు చెందిన రాజ్కుమార్.. సరూర్నగర్లో ఉంటూ ప్రైవేట్ డ్రైవర్గా పనిచేస్తున్నాడు. ఇదే నగరంలో ఉంటున్న రంగలాల్ అనే వ్యక్తి కూడా బీదర్కు చెందిన వాడే. ఇద్దరికి పరిచయం ఏర్పడింది. ఈనెల 19న బొలేరో వాహనంలో దానిమ్మ పండ్లు తీసుకుని రాజమండ్రి వెళ్లడానికి రాజ్కుమార్కు కిరాయి వచ్చింది.
దానిమ్మ పండ్ల లోడ్తో రాజమండ్రికి..
ఈ విషయం తెలుసుకున్న రంగలాల్.. తిరిగివచ్చే అప్పుడు గంజాయి తీసుకొద్దామని రాజ్కు చెప్పాడు. దీనికి అంగీకరించిన రాజ్.. తనతో రంగలాల్ను రాజమండ్రి తీసుకువెళ్లాడు. దానిమ్మ పండ్ల లోడ్ను రాజమండ్రిలో దింపి.. అక్కణ్నుంచి గోకవరం అటవీ ప్రాంతంలోకి వెళ్లారు. అక్కడి గంజాయిని ప్యాకెట్లలో నింపి హైదరాబాద్ మీదుగా బీదర్కు బయలుదేరారు.
320 కిలోల గంజాయి..
ముందస్తు సమాచారం అందుకున్న పోలీసులు కొత్తపేట్ వద్ద వాహన తనిఖీలు నిర్వహించారు. అనుమానం వచ్చి బొలేరో వాహనాన్ని తనిఖీ చేశారు. వాహనంలో 320 కిలోల గంజాయి తరలిస్తున్నట్లు గుర్తించారు. గంజాయిని స్వాధీనం చేసుకుని రాజ్కుమార్ను అరెస్టు చేశారు. పోలీసులను చూసిన రంగలాల్ అక్కణ్నుంచి పరారీ కావడంతో అతడి కోసం గాలిస్తున్నారు.
