అభివృద్ధి భారతం దిశగా...
మహబూబాబాద్లో నిర్వహించిన విజయ సంకల్ప సభలో పాల్గొన్న కేంద్ర హోం మంత్రి రాజ్నాథ్ సింగ్... మోదీ మరోసారి తప్పకుండా ప్రధాని అవుతారని ధీమా వ్యక్తం చేశారు. దేశ అభివృద్ధి కోసం ఐదేళ్లుగా భాజపా విశేష కృషి చేసిందని... మరోసారి అవకాశం ఇస్తే పేదరికం లేని దేశంగా భారత్ని తీర్చిదిద్దుతామని స్పష్టం చేశారు. ప్రపంచంలో అభివృద్ధి చెందిన దేశాలు సైతం భారత్వైపు చూసేలా మోదీ కృషి చేశారని వెల్లడించారు. మరోసారి అవకాశం ఇస్తే... 2028 కల్లా దేశాన్ని అభివృద్ధిలో మూడో స్థానానికి చేరుస్తామని తెలిపారు.
పసుపు, ఎర్రజొన్న రైతులకు బాసట...
అంతకు ముందు నిజామాబాద్ పాలిటెక్నిక్ మైదానంలో నిర్వహించిన బహిరంగ సభలో పాల్గొన్న రాజ్నాథ్... రైతుల కోసం నిజామాబాద్ లో పసుపు బోర్డు ఏర్పాటు చేస్తామని హామీ ఇచ్చారు. ఎర్రజొన్నలకు మద్దతు ధర కల్పిస్తామని... మూతపడిన షుగర్ ఫ్యాక్టరీలను తెరిపిస్తామని ప్రకటించారు.
ప్రగతి పథంలో నడిపించేందుకు...
పదేళ్లు పాలించిన యుపీఏ... పేదలను పట్టించుకోలేదని ఆరోపించిన మంత్రి... 2022లో ప్రతి పేదవానికి ఇళ్లుండేలా కృషి చేస్తామని హామీ ఇచ్చారు. రైతులకు భరోసా కల్పించి భాసటగా నిలుస్తామన్నారు. మోదీని ప్రధాని చేసి దేశాన్ని ప్రగతి పథంలో నడిపించేందుకు సమర్థులైన భాజపా ఎంపీలను గెలిపించాలని రాజ్నాథ్ కోరారు.
వేదిక వద్ద స్వల్ప అగ్నిప్రమాదం...
కేంద్ర హోం మంత్రి పాల్గొన్న నిజామాబాద్ సభలో స్వల్ప అపశ్రుతి దొర్లింది. వేదిక పక్కనే షార్ట్ సర్క్యూట్ కారణంగా మంటలు చెలరేగాయి. వెంటనే స్పందించిన అగ్నిమాపక సిబ్బంది మంటలు ఆర్పేశారు. కొన్ని క్షణాల ముందు అదే ప్రదేశంలో రాజ్నాథ్ వాహనం ఆపిఉంచారు. సిబ్బంది అప్రమత్తతో తృటిలో ప్రమాదం తప్పింది.
ఇవీ చూడండి:దేశమంతా ఓ ఎత్తు... నిజామాబాద్ మరోఎత్తు...!
