ఉమ్మడి మహబూబ్నగర్ జిల్లాలో గత 2 రోజులుగా కరోనా కొత్త కేసులు నమోదు కావడం లేదు. ఉమ్మడి జిల్లాలో అత్యధికంగా జోగులాంబ గద్వాల జిల్లాలో 45 పాజిటివ్ కేసులు ఉన్నాయి. గద్వాల, అలంపూర్, అయిజ, వడ్డేపల్లి, ఇటిక్యాల, రాజోలి ప్రాంతాల్లో ఈ కేసులు నమోదు కాగా.. వారి ప్రైమరీ కాంటాక్టు వారందరినీ ప్రస్తుతం హోం క్వారంటైన్కు తరలించారు. సుమారు 1250 మంది హోం క్వారంటైన్లో కొనసాగుతున్నారు.
జోగులాంబ గద్వాల జిల్లా నుంచి ఎక్కువ మంది వైద్యం కోసం కర్నూల్కు వెళుతున్న నేపథ్యంలో అధికారులు ప్రజల్లో అవగాహన కల్పిస్తున్నారు. కర్నూల్కు ఎవరూ వెళ్లొద్దని సూచిస్తున్నారు. మరోవైపు కర్ణాటక, ఆంధ్రప్రదేశ్ సరిహద్దుల్లోంచి జిల్లాలోకి ఎవరూ ప్రవేశించకుండా భద్రతను కట్టుదిట్టం చేశారు.
ఇక మహబూబ్నగర్, నారాయణపేట, నాగర్కర్నూల్ జిల్లాల్లో కొత్త కేసులు లేవు. వనపర్తి జిల్లాలో ఇప్పటి వరకు ఒక్క కేసూ నమోదు కాలేదు. అన్ని చోట్ల ఉదయం 6 గంటల నుంచి సాయంత్రం 6 గంటల వరకు నిత్యావసరాల కొనుగోలుకు అనుమతించారు.
ఇదీ చూడండి: ప్రజలు బయటకు రాకుండా తాళాలు.. తెరిపించిన కలెక్టర్
