నిత్యం వార్తల్లో నిలిచే ఖమ్మం జిల్లా వైరా ఎమ్మెల్యే రాములు నాయక్... ఏఐసీసీ అధ్యక్షురాలు సోనియాగాంధీపై ఆసక్తికర వ్యాఖ్యలు చేశారు. కారేపల్లి మండలంలో కల్యాణలక్ష్మి, షాదీ ముబారక్ చెక్కుల పంపిణీ, సీసీ రోడ్ల నిర్మాణానికి శంకుస్థాపన సందర్భంగా ఏర్పాటు చేసిన సమావేశంలో పాల్గొన్న ఆయన.... 2014లో ప్రత్యేక రాష్ట్ర సాధన కోసం ఉద్యమకారులు చనిపోయే పరిస్థితిలో ఉన్నారని గ్రహించి తెలంగాణ రాష్ట్రాన్ని సోనియాగాంధీ ఇచ్చారని పేర్కొన్నారు. అందుకు ఆమెకు థాంక్స్ చెప్పాలన్నారు.
20 ఏళ్లు కొట్లాడి.. చివరికి చచ్చిపోయే పరిస్థితి వరకు పోయి 2014లో ప్రత్యేక రాష్ట్రం సాధించుకున్నాం. అమ్మ సోనియాగాంధీగారు ఇచ్చారు. ఆమెకు థాంక్స్ చెప్పాలి. ఎందుకంటే ఆమెకు కూడా తెలుసు తెలంగాణ బిడ్డలు వివక్షతకు గురవుతున్నారని. ఎడారి ప్రాంతంలో ఉన్నారు. వనరులన్నీ పుష్కలంగా ఉన్నాయి. కానీ ఇక్కడ ఉద్యోగాలు లేవు, నీళ్లు లేవు, నియామకాలు లేవు. ఈ మూడింట్లోనూ తెలంగాణ వాసులు దగా పడుతున్నారని గ్రహించి ప్రత్యేక రాష్ట్రం ఫైలుపై సంతకం పెట్టేశారు. ప్రత్యేక రాష్ట్రం వచ్చిన తర్వాత మన వనరులను మనం అనుభవిస్తున్నాం. ఆ రోజుల్లో పక్కకుపోయిన వనరులే ఇవాళ మనం తింటున్నాం కాబట్టి... మనం ఎక్కడా ఒడిదొడుకులు లేకుండా ప్రతి గూడెం, ప్రతి కుటుంబంలో ఆనందంగా ఉంటున్నాం. ప్రతి గుడిసె కూడా రేపు డబుల్బెడ్రూం అవుతుంది. బియ్యము ఇస్తాం, పింఛను ఇస్తాం, రైతుబంధు ఇస్తాం, రైతు బీమా ఇస్తాం. ఉచిత విద్యుత్ ఇస్తాం.
-రాములు నాయక్, వైరా నియోజకవర్గ ఎమ్మెల్యే.
ఇదీ చూడండి: భవిష్యత్లో... బీసీ, మైనారిటీ, అగ్రవర్ణ పేదలబంధు: కేసీఆర్‌
