ఖమ్మం జిల్లా కారేపల్లి మండలం కేంద్రంగా తండాలకు చెందిన ఓ 10 మంది ముఠా బీమా పరిహారం పేరిట అక్రమాలకు ఆజ్యం పోశారు. గతేడాది అక్టోబరులో కరోనా రక్షక్‌ బీమా పేరుతో ఓ వ్యక్తి రూ.2000 చెల్లించి పేరు నమోదు చేయించుకున్నారు. కరోనా బారినపడ్డ అనంతరం 72 గంటలు ఖమ్మంలోని ఓ ప్రైవేటు ఆస్పత్రిలో చికిత్స పొంది తగిన ఆధారాలతో బీమాకు దరఖాస్తు చేసుకోగా రూ.2.5 లక్షలు వచ్చాయి. దీన్ని ఆసరాగా చేసుకొని ఓ ముఠా.. భారీ మోసానికే తెరలేపింది. దుబ్బతండా, మేకలతండా, గంగారంతండా నుంచి 700 మందికి బీమా చేయించారు. ఒక్కొక్కరి నుంచి బీమా ప్రీమియం రూ.2300తోపాటు ఇతర ఖర్చులు రూ.2700 కలిపి రూ.5 వేలు వసూలు చేశారు. ఆ తర్వాత వారి పేరిట కొవిడ్‌ బీమా పరిహారం కాజేసేందుకు పక్కా ప్రణాళికతో వ్యూహరచన చేశారు.
నిఘా వర్గాల ఆరా
కారేపల్లి మండలంలో సంచలనం రేపుతున్న ఈ వ్యవహారంపై అటు నిఘావర్గాలు, ఇటు పోలీసు శాఖ పూర్తిస్థాయిలో విచారణ సాగిస్తున్నట్లు తెలిసింది. సూత్రధారులు ఎవరు? ముఠాలో మొత్తం ఎంతమంది ఉన్నారు? సభ్యులకు ఏం చెప్పి ఇందులోకి లాగారు? కుమ్మక్కైన ప్రయివేటు ఆసుపత్రులేంటి? అన్న అంశాలపై ఆరా తీస్తున్నట్లు సమాచారం. బీమా సంస్థ సైతం తదుపరి కార్యాచరణకు సిద్ధమైనట్లు తెలిసింది.
తిలా పాపం తలా పిడికెడు..
ఇప్పటికే 90మంది పేరిట పరిహారం కోసం నకిలీ పత్రాలతో దరఖాస్తులు చేయగా 30మంది ఖాతాల్లో బీమా సొమ్ము జమైంది. ఒక్కొక్కరికిరూ.2.5 లక్షల చొప్పున రూ.75 లక్షలు జమ కాగా ఈ మొత్తంలో రూ.45 లక్షలు ముఠా సభ్యులు నొక్కేశారు. సభ్యులకు రూ.లక్ష చొప్పున ఇచ్చి, మిగిలిన రూ.లక్షన్నర జేబుల్లో వేసుకున్నారు. బీమా విషయం ఈనోటా ఆనోటా తెలిసి తండాలు విస్తరించాయి. ఫలితంగా మేమంటే మేమంటూ దరఖాస్తు చేసుకునే పరిస్థితి వచ్చింది. బీమా సభ్యుల సంఖ్య చివరకు 700కు చేరింది.
ప్రైవేటు ఆస్పత్రులతో కుమ్మక్కు..
దరఖాస్తుదారులకు కొవిడ్‌ రాకున్నా వచ్చినట్టు రిపోర్టులు, ఆసుపత్రుల్లో చేరి వైద్యం పొందినట్టు బిల్లులనూ అక్రమార్కులు సృష్టించారు. ఖమ్మంలోని మూడు ప్రైవేటు ఆస్పత్రులతోపాటు కొత్తగూడెం నుంచీ వైద్యం పొందినట్లు నకిలీ పత్రాలు సృష్టించి బీమా పరిహారం కోసం దరఖాస్తులు చేశారు. మహబూబాబాద్‌ జిల్లా గార్ల ప్రభుత్వ సామాజిక ఆరోగ్య కేంద్రంలో ఆరుగురి పేరిట పాజిటివ్‌ రిపోర్టులు పొందటం గమనార్హం. కారేపల్లి మండలం నుంచి దరఖాస్తులు వెల్లువెత్తడంతో బీమా సంస్థ ప్రతినిధులకు అనుమానం వచ్చింది. వారం క్రితం హెదరాబాద్‌కు చెందిన సంస్థ ప్రతినిధులు గార్ల సీహెచ్‌సీ వైద్యుడిని సంప్రదించడంతో అసలు విషయం వెలుగులోకి వచ్చింది. రిపోర్టులను పరిశీలించిన సదరు వైద్యుడు వాటిపై సంతకం తనది కాదని చెప్పడంతో అవి నకిలీవని తేలింది. నకిలీ వైద్యం చేసిన ఖమ్మంలోని మూడు ఆస్పత్రులు ఏవన్నదీ తేలాల్సి ఉంది.
బీమా కోసం దరఖాస్తులు చేశా: వినోద్‌, నెట్‌ నిర్వాహకుడు
రెండు తండాల నుంచి ఇన్సూరెన్స్‌ల కోసం 700మందికి పాన్‌, ఆధార్‌ కార్డుల ఆధారంగా దరఖాస్తు చేశాను. క్లెయిం అయిన సందర్భంలో మాత్రం ఎవరూ నా వద్దకు రాలేదు. దరఖాస్తు చేసే సమయంలో వచ్చిన కొద్దిమంది వ్యక్తులే క్లెయిమ్‌ పనులు చక్కబెట్టినట్టు తెలిసింది.
ఫిర్యాదులు అందలేదు:
హెల్త్‌ ఇన్సూరెన్స్‌ పాలసీల వ్యవహారంపై కంపెనీల నుంచి ఎలాంటి ఫిర్యాదులు అందలేదు. ఆన్‌లైన్‌లో నమోదు చేసిన నెట్‌ నిర్వాహకుణ్ని పిలిపించి వివరాలు నమోదు చేసుకున్నాం.
-ఆరీఫ్‌ అలీఖాన్‌, సీఐ కారేపల్లి
ఇదీ చూడండి: IAS Wedding Invitation Video Viral : లవ్స్టోరీ వీడియోతో ఐఏఎస్ పెళ్లి ఆహ్వానం..
