చనిపోయిన కుక్కను తొలగించనందుకు కార్పొరేటర్​పై తిరగబడిన స్థానికులు

ఎన్నికల సమయంలో అది చేస్తాం.. ఇది చేస్తాం అని నేతలు హామీ ఇస్తారు. ఈ ప్రజాప్రతినిధి వస్తేనైనా తమ ఇబ్బందులు తీరుతాయని ప్రజలు వారిని ఎన్నుకుంటారు. కానీ అధికారం చేపట్టాక వాటన్నింటిని మర్చిపోయి రేపు చేస్తాం.. మాపు చేస్తాం అనే ధోరణితో వ్యవహారిస్తారు. ఇలాంటివి వినివిని విసిగివేసారిన ఓటర్లు ఓ కార్పొరేటర్​పై తిరగబడిన ఘటన రామగుండం కార్పొరేషన్​లో చోటుచేసుకుంది.

పెద్దపల్లి జిల్లా రామగుండంలో స్థానిక సమస్యలు పరిష్కరించడంలేదని ఓ కార్పొరేటర్​పై ఓటర్లు తిరగబడ్డారు. నగరపాలక సంస్థ 14వ డివిజన్ లక్ష్మిపురంలో ఎన్నికల సమయంలో ఇచ్చిన హామీలు ఎందుకు అమలు చేయడం లేదని నిలదీశారు. వారిని ఓ సమస్య తీవ్రంగా ఇబ్బంది కలిగిస్తుండడంతో దానిపై ప్రశ్నించగా.. కార్పొరేటర్ వ్యంగ్యంగా సమాధానం ఇవ్వడంతో స్థానికులు ఆగ్రహం వ్యక్తం చేశారు.

రామగుండం నగరపాలక సంస్థ 14వ డివిజన్​ లక్ష్మిపురంలో కొద్ది రోజుల క్రితం ఓ కుక్క చనిపోయింది. అది కుళ్లి దుర్గంధం వెదజల్లుతుండడంతో ఆ కంపు భరించలేక దానిని తొలగించాలని కార్పొరేటర్​కు విన్నవించారు. దానికి కార్పొరేటర్ మీరే ఒక్కొక్కరు 50 రూపాయలు వేసుకొని తొలగించుకోండంటూ వ్యంగ్యంగా సమాధానం ఇచ్చాడు. దాంతో ఆగ్రహించిన స్థానిక ప్రజలు కార్పొరేటర్ నీల పద్మ ఇంటికి వెళ్లి నిలదీశారు. స్థానికంగా నెలకొన్న సమస్యలను ఎందుకు పట్టించుకోవడం లేదంటూ ప్రశ్నించారు.

దానికి సదరు కార్పొరేటర్ భర్త ఇచ్చిన సమాధానానికి ముక్కున వేలేసుకున్నారు. పైసలు లేనిదే ఏం పని చేయరని కార్పొరేటర్​పై పలు ఆరోపణలు ఉన్నాయి. ఆర్ఎఫ్​సీఎల్​ ఉద్యోగాల పేరిట 40 మంది వద్ద ఆమె భర్త డబ్బులు తీసుకుని.. వారిని ఇంటి చుట్టూ తిప్పించుకుంటున్నారని కొందరు తమ గోడు వెల్లబోసుకున్నారు. ఎవరైనా నూతనంగా ఇళ్లు నిర్మించుకున్నా.. డబ్బులు ఇవ్వాలంటున్నారని ఆవేదన వ్యక్తం చేశారు. ఎమ్మెల్యేనే ఏం పనిచేస్తలేడు తాము ఎందుకు చేయాలంటూ సమాధానం ఇచ్చాడని స్థానికులు వాపోయారు.

ఇవీ చదవండి: