YSRCP MLA KOTAMREDDY SRIDHAR REDDY: ఏకైక రాజధానిగా అమరావతినే కొనసాగించాలంటూ పాదయాత్ర చేస్తున్న రైతులకు ఆశ్చర్యపరిచే పరిణామం ఎదురైంది. నెల్లూరు అంబాపురంలోని శాలివాహన ఫంక్షన్ హాల్లో బస చేసిన రైతుల వద్దకు అధికార వైకాపా ఎమ్మెల్యే కోటంరెడ్డి శ్రీధర్‌రెడ్డి(ysrcp mla kotamreddy sridhar reddy) వచ్చారు. ఆయన్ను చూసి అమరావతి రైతులు(mla meet amaravathi padayatra farmers) మొదట నివ్వెరపోయారు. అనంతరం ఆనందం వ్యక్తం చేశారు. నెల్లూరు గ్రామీణ ఎమ్మెల్యేగా ప్రాతినిథ్యం వహిస్తున్న కోటంరెడ్డి శ్రీధర్‌రెడ్డి అంబాపురం మీదుగా వెళ్తున్న సమయంలో.. అక్కడ వెంకటేశ్వరస్వామి రథంతో పాటు వాహనాలు కనిపించటంతో తన అనుచరుల్ని అడిగారు. పాదయాత్ర చేస్తున్న అమరావతి రైతులు ఇక్కడే బస చేశారని అనుచరులు చెప్పారు. మన ప్రాంతానికి వచ్చిన అతిథుల్ని పలకరిద్దామంటూ... ఆయన తన వాహనం దిగి ఫంక్షన్ హాల్లోకి వెళ్లారు.
ఆయన్ను గుర్తుపట్టిన అమరావతి రైతులు(amaravathi farmers) నమస్కారం చేసి లోపలకు ఆహ్వానించారు. వారికి ప్రతి నమస్కారం చేస్తూ ఎలా ఉన్నారని రైతుల్ని అడిగారు. తన నియోజకవర్గం మీదుగా వెళ్తున్నారు కాబట్టి ఇక్కడ ఏ అవసరం వచ్చినా చెప్పాలని కోరారు. ప్రస్తుతం వర్షాలు పడుతున్నందున జాగ్రత్తగా వెళ్లాలని సూచించారు. ఈ సందర్భంగా కొందరు రైతులు జై అమరావతి అనాలని కోరగా సున్నితంగా తిరస్కరించారు. ఆ మాట అనేందుకు తనకు కొన్ని ఇబ్బందులు ఉన్నాయని చెప్పారు. వైకాపా మంత్రులు, ఎమ్మెల్యేలు అమరావతి రైతుల పాదయాత్రను విమర్శిస్తున్న తరుణంలో... అధికార పార్టీ ఎమ్మెల్యే మద్దతుగా మాట్లడటంపై రైతులు ఆనందం వ్యక్తం చేశారు.
కొనసాగుతున్న మహాపాదయాత్ర
అమరావతినే ఆంధ్రప్రదేశ్‌ రాజధానిగా కొనసాగించాలంటూ రైతులు మహా పాదయాత్ర(amaravathi farmers padayatra) చేపట్టారు. న్యాయస్థానం టూ దేవస్థానం పేరుతో పాదయాత్రను కొనసాగిస్తున్నారు. అమరావతి రైతుల పోరాటానికి అడుగడుగునా ప్రజలు బ్రహ్మరథం పడుతున్నారు. ప్రతి గ్రామంలో వారికి మద్దతుగా నిలుస్తూ ప్రోత్సహిస్తున్నారు. ఇటీవల ఏపీ ప్రభుత్వం మూడు రాజధానుల బిల్లు రద్దు చేస్తున్నట్లు ప్రకటించింది. కానీ సమగ్ర వివరాలతో మళ్లీ ప్రేవేశపెడతామని తేల్చి చెప్పడంతో అమరావతి రైతులు తమ పోరాటాన్ని కొనసాగిస్తున్నారు.
పలు పార్టీల మద్దతు
మహా పాదయాత్రకు పలు రాజకీయ పార్టీల మద్దతు లభిస్తోంది. గుంటూరు, ప్రకాశం జిల్లాల్లో కొనసాగిన పాదయాత్రలో ప్రముఖ రాజకీయ నాయకులు సైతం పాల్గొన్నారు. భాజపా రాష్ట్ర నాయకులు సోము వీర్రాజు, పురంధరేశ్వరి, కన్నా లక్ష్మీనారాయణ పాల్గొని సంపూర్ణ మద్దతు తెలిపారు. పవన్ కల్యాణ్ జనసేన తరఫున ఆ పార్టీ నాయకుడు నాదెండ్ల మనోహర్ సైతం అమరావతి రైతుల మహా పాదయాత్రలో పాల్గొని వారికి మద్దతు ప్రకటించారు.
