హైదరాబాద్లో లాక్డౌన్ నిబంధనలు ఉల్లంఘించి బయటకు వచ్చిన వారిపై ట్రాఫిక్ పోలీసులు ఉక్కుపాదం మోపుతున్నారు. ఇప్పటివరకు నగరంలో 11 లక్షలకు పైగా వాహనాలకు జరిమానా విధించి స్వాధీనం చేసుకున్నారు. మార్చి 23 నుంచి ఏప్రిల్ 20 వరకు రోజుకు కనీసం 13-15వేల వాహనాలకు పోలీసులు జరిమానా విధిస్తున్నారు.
తనిఖీలు ముమ్మరం చేసిన పోలీసులు ట్రాఫిక్ నిబంధనలు ఉల్లంఘించే వారిని తమ కెమెరాల్లో బంధిస్తున్నారు. హైదరాబాద్ కమిషనరేట్ పరిధిలో నెల రోజుల వ్యవధిలో 5.15 లక్షలకు పైగా వాహనాలపై జరిమానా విధించారు. వీటిలో 50వేలకు పైగా వాహనాలను స్వాధీనం చేసుకున్నారు. మొత్తం వాహనాల్లో ద్విచక్ర వాహనాలే సుమారు 95శాతం ఉన్నాయి.
సైబరాబాద్, రాచకొండ కమిషనరేట్ పరిధిల్లోనూ పోలీసులు పకడ్బందీగా వ్యవహరిస్తున్నారు. రెండు కమిషనరేట్ల పరిధిలో కలిపి 6.26 లక్షల వాహనాలపై జరిమానా విధించారు. వీటిలో 50వేలకు పైగా వాహనాలు స్వాధీనం చేసుకున్నారు. మూడు కమిషనరేట్లతో పోలిస్తే సైబరాబాద్ కమిషనరేట్ పరిధిలో అధికంగా 5.4లక్షల కేసులు నమోదు చేశారు.
లాక్ డౌన్ లో నిబంధనలు ఉల్లంఘిస్తున్న వాహనదారులను గుర్తించేందుకు పోలీసులు సాంకేతికతను ఉపయోగించుకుంటున్నారు. ఆటోమెటిక్ నెంబర్ ప్లేట్ రికగ్నైజేషన్ ద్వారా వాహనదారులను గుర్తిస్తున్నారు. వాహనదారులు 3 కి.మీ ల కంటే ఎక్కువ దూరం వెళితే ఈ కెమెరాలు వెంటనే గుర్తించి కమాండ్ కంట్రోల్ రూమ్కు సందేశం పంపిస్తాయి. పోలీసులు దీని ఆధారంగా జరిమానా విధిస్తున్నారు.
మూడు కమిషనరేట్ల పరిధిలో 300 ప్రాంతాల్లో 500 ఏఎన్పీఆర్ కెమెరాలను అమర్చారు. నిబంధనలు ఉల్లంఘిస్తున్న లక్షల వాహనాలను ఈ కెమెరాలు గుర్తిస్తున్నారు.
ఆర్థికంగా ఎంతో నష్టం చేకూరుతున్నా... ప్రజల ప్రాణాలే ముఖ్యమని ప్రభుత్వం లాక్ డౌన్ ను కొనసాగిస్తోందని పోలీసు అధికారులు అన్నారు. ప్రతి ఒక్కరూ ఈ విషయాన్ని గమనించి.... బయట తిరగకుండా ఇళ్లల్లోనే ఉండాలని కోరుతున్నారు.
