సరకు రవాణాకు ఆర్టీసీ రంగం సిద్ధం చేసింది. నూతన సంవత్సరం కానుకగా జనవరి 1 నుంచి రవాణా చేసేందుకు యాజమాన్యం నిర్ణయించింది. నష్టాల్లో ఉన్న ఆర్టీసీని గట్టెక్కించేందుకు... సరకు రవాణా రంగంలోకి అడుగుపెట్టాలని డిసెంబర్ 1న జరిగిన ఆత్మీయ సమావేశంలో అధికారులను ముఖ్యమంత్రి ఆదేశించారు. దశలవారీగా డీవీఎంలు, డీఎంలతో ఉన్నతాధికారులు సమావేశమై తుది ప్రణాళికలు రూపొందించారు.
పాత బస్సులు...
ఎక్కువ కిలోమీటర్లు తిరిగిన గ్రేటర్ హైదరాబాద్ పరిధిలోని వెయ్యి ఆర్టీసీ బస్సులను సరకు రవాణా బస్సులుగా మార్చాలని నిర్ణయించారు. ఇప్పటికే రాష్ట్రంలో ఉన్న 97 డిపోల్లో డిపోకు ఒకరు, రీజియన్‌కు ఒకరి చొప్పున కంప్యూటర్ ఆపరేటర్లు, సూపర్ వైజర్లను నియమించాలని ఆర్టీసీ ఇంచార్జ్ ఎండి సునీల్ శర్మ స్పష్టం చేశారు. ప్రైవేట్ ఆపరేటర్లు ఎలాంటి సరకులను, ఏ ప్రాంతాలకు రవాణా చేస్తున్నారు... కిలోకు ఎంత ఛార్జీ తీసుకుంటున్నారు వంటి అంశాలపై అధ్యయనం చేసి డిపో మేనేజర్లు ఉన్నతాధికారులకు నివేదిక సమర్పించారు. కొన్ని మార్పులతో ఉన్నతాధికారులు తుది నివేదక రూపొందించారు.
ఎర్రబస్సులు..
సరకు రవాణా బస్సులకు ఎర్ర రంగు వినియోగించాలని... డ్రైవర్లకు, సిబ్బందికి డ్రెస్ కోడ్ ఉండాలని ఈడీలతో మంగళవారం జరిగిన సమావేశంలో నిర్ణయించినట్లు అధికారులు తెలిపారు. ప్రైవేట్ అపరేటర్లకు దీటుగా పనిచేసేలా ప్రాణాళికలు సిద్ధం చేశారు. విస్తృతమైన నెట్‌వర్క్ ఉన్నందున కచ్చితంగా విజయం సాధిస్తామని అధికారులు ధీమా వ్యక్తం చేస్తున్నారు.
సురక్షిత ప్రయాణంతోపాటు సరైన సమయానికి చేర్చడంలో ఆర్టీసీకి మంచి పేరుంది. దాన్నే సరకు రవాణాకూ కొనసాగించాలని అధికారులు భావిస్తున్నారు. అంతే కాకుండా ప్రజాప్రతినిధులు అందరూ ఆర్టీసీ బస్సుల్లో ప్రయాణించాలని రవాణాశాఖ మంత్రి పువ్వాడ అజయ్‌కుమార్‌ లేఖలు కూడా రాశారు. వచ్చే మంగళవారం గ్రేటర్ పరిధిలోని అన్ని డిపోల్లో వనభోజనాలు చేయాలని మంత్రి నిర్ణయించారు.
ఇదీ చూడండి: లోకాయుక్తగా జస్టిస్ వెంకటరాములు.. హెచ్ఆర్సీ ఛైర్మన్గా జస్టిస్ చంద్రయ్య
