పాల పన్నుపై గులాబీ పోరు.. రాష్ట్రవ్యాప్తంగా నిరసనల హోరు..

TRS Protests: పాలు, పాల అనుబంధ ఉత్పత్తులపైన కేంద్ర ప్రభుత్వం జీఎస్టీ విధించటాన్ని వ్యతిరేకిస్తూ... తెరాస నిరసనలు చేపట్టింది. ఆ పార్టీ కార్యనిర్వాహక అధ్యక్షుడు కేటీఆర్​ పిలుపు మేరకు... హైదరాబాద్‌తో పాటు జిల్లాల్లోనూ కేంద్రానికి వ్యతిరేకంగా గులాబీపార్టీ శ్రేణులు వ్యతిరేక ప్రదర్శనలు నిర్వహించాయి. మంత్రులు, ఎమ్మెల్యేలు భాజపాపై విమర్శలు గుప్పించారు.

TRS Protests: పేదలపై కేంద్రప్రభుత్వం జీఎస్టీ పేరుతో మోయలేని భారం మోపుతోందని తెరాస నిరసన బాటపట్టింది. పాలు, పాల అనుబంధ ఉత్పత్తులపై పన్ను విధింపునకు వ్యతిరేకంగా రాష్ట్రవ్యాప్తంగా ఆ పార్టీ శ్రేణులు ఆందోళనలు చేపట్టాయి. చరిత్రలో ఎప్పుడూ లేని విధంగా పాలు, పాల ఉత్పత్తులపై జీఎస్టీ విధింపు నిర్ణయాన్ని వ్యతిరేకిస్తూ నిరసనలు చేపట్టాలని కేటీఆర్​ పిలుపునిచ్చారు. ఇందులో భాగంగా హైదరాబాద్‌తో పాటు జిల్లాల్లోనూ గులాబీపార్టీ శ్రేణులు నిరసనలు నిర్వహించాయి.

ఖైరతాబాద్ నియోజకవర్గం ఫిల్మ్‌నగర్‌ చౌరస్తాలో స్థానిక ఎమ్మెల్యే దానం నాగేందర్ ఆధ్వర్యంలో ప్లకార్డులతో నిరసన ప్రదర్శన చేశారు. మేడ్చల్‌లో మంత్రి మల్లారెడ్డి ఆధ్వర్యంలో జాతీయ రహదారిపై ధర్నా చేపట్టారు. కేంద్రం నిర్ణయాలతో సామాన్యుల బతుకులు దుర్భరంగా మారుతున్నాయని మల్లారెడ్డి మండిపడ్డారు.

మహబూబ్​నగర్​లోని తెలంగాణ చౌరస్తాలో మంత్రి శ్రీనివాస్‌గౌడ్‌ ఆధ్వర్యంలో నిరసన కొనసాగింది. భాజపా నేతృత్వంలోని సర్కార్‌ పేదలపై పన్నుభారం మోపుతోందని ఆరోపించారు. ఆదిలాబాద్‌లో మోదీ హఠావో దేశ్ బచావో అంటూ పాల డబ్బాలతో గులాబీ శ్రేణులు ర్యాలీ నిర్వహించారు. పాలు, పెరుగుపై జీఎస్టీ విధించడంపై జగిత్యాలలో తహసిల్‌ చౌరస్తా వద్ద తెరాస శ్రేణులు ధర్నా నిర్వహించాయి. చేతిలో పాల ప్యాకెట్లను పట్టుకుని తెరాస కార్యకర్తలు మెట్‌పల్లిలో జాతీయ రహదారిపై నిరసన చేపట్టారు. జీఎస్టీ భారం తగ్గించాలని పెద్దపల్లి జిల్లా రామగుండం కార్పొరేషన్ కార్యాలయం ఎదుట గులాబీ పార్టీ శ్రేణులు నినదించాయి. సిద్దిపేట జిల్లా హుస్నాబాద్, అక్కన్నపేట, కోహెడ మండల కేంద్రాల్లో ధర్నా, రాస్తారోకోలు కొనసాగాయి.

ఇవీ చూడండి: