పాతబస్తీలో భారీ భద్రత, ముస్లింల ప్రత్యేక ప్రార్థనల నేపథ్యంలో పటిష్ఠ నిఘా

Old City riots in Hyderabad పాతబస్తీలో పోలీసులు భారీ భద్రతను ఏర్పాటు చేశారు. నేడు ముస్లిం సోదరులు ప్రత్యేక ప్రార్థనలు చేసే అవకాశం ఉన్న నేపథ్యంలో ర్యాపిడ్ యాక్షన్ ఫోర్స్‌లతో పాటు, సాధారణ పోలీసులను కూడా మోహరించారు. మరోపక్క అందరూ శాంతియుతంగా నమాజ్ చేసుకోవాలని ఎంఐఎం అధినేత అసదుద్దీన్ ఒవైసీ సూచించారు.

Old City riots in Hyderabad: ఇవాళ ముస్లిం సోదరులు ప్రత్యేక ప్రార్థనలు చేయనున్న నేపథ్యంలో చార్మినార్ పరిసర ప్రాంతాలు, పాతబస్తీలో భారీగా పోలీసులు మోహరించారు. చార్మినార్ పరిసర ప్రాంతాల్లో ఉన్న దుకాణాలను నిన్న రాత్రి ఏడు గంటలకే మూసేయించారు. పోలీసులు గస్తీ వాహనాలతో పహారా కాస్తున్నారు. చార్మినార్ పరిసర ప్రాంతాలకు ఎవ్వరినీ అనుమతించడంలేదు. ఎటువంటి అవాంఛనీయ ఘటనలు జరగకుండా పోలీసులు ముందస్తు చర్యలు చేపట్టారు. చార్మినార్ నాలుగు దిక్కులా.. బారికేడ్లను ఏర్పాటు చేశారు.

ఎంఐఎం డిమాండ్ మేరకు గోషామహల్ ఎమ్మెల్యే రాజాసింగ్​పై పిడీ యాక్ట్​ పెట్టడంతో పాటు, రాజాసింగ్​ను అరెస్ట్ చేసి.. జైలుకు తరలించారని ఎంఐఎం అధినేత, ఎంపీ అసదుద్దీన్ పేర్కొన్నారు. జుమ్మా సందర్బంగా చేసే నమాజ్‌ను శాంతియుతంగా చేసుకోవాలని అసదుద్దీన్ ఒవైసీ ముస్లిం సోదరులకు సూచించారు. నమాజ్ తర్వాత అందరూ ప్రశాంతంగా వెళ్లిపోవాలన్నారు. ఎక్కడా ఎవరికి ఇబ్బంది కలగకుండా చూసుకోవాలన్నారు. ఎలాంటి ఘటనలకు పాల్పడినా.. హైదరాబాద్ పేరు చెడిపోతుందన్నారు.

భాగ్యనగరంలో అల్లర్లు సృష్టిస్తున్న మూకలపై కఠిన చర్యలు తీసుకోవాలని.. విశ్వహిందూ పరిషత్ కోరింది. డీజీపీ మహేందర్ రెడ్డిని కలిసి పాతనగరం పరిస్థితిని విశ్వహిందూ పరిషత్ రాష్ట్ర బృందసభ్యులు వివరించారు. అధికార దాహం కోసమే తెలంగాణ సర్కార్.. హిందూ వ్యతిరేక శక్తులను ప్రోత్సహిస్తూ హిందుత్వంపై విషం చిమ్మే పనిలో పూర్తిస్థాయిలో నిమగ్నమైందని ఆరోపించారు. మునావర్ ఫరూక్ అనే హిందూ ద్రోహిని ప్రోత్సహిస్తూ.. ఇటీవల అతడి కామెడీ షోకు పోలీసులు అనుమతి ఇచ్చి హిందువులను రెచ్చగొట్టారని పేర్కొన్నారు. కట్టుదిట్టమైన భద్రత ఏర్పాటు చేసి.. భాగ్యనగరంలో హిందువులకు రక్షణ కల్పించాలని విశ్వహిందూ పరిషత్ నాయకులు డిమాండ్ చేశారు.

• ఇవీ చూడండి: నా ప్రాణం ఉన్నంత వరకు రాష్ట్రాన్ని ఆగం కానివ్వనన్న కేసీఆర్