తితిదే వెబ్సైట్లో సాంకేతిక సమస్య తలెత్తింది. దీంతో ప్రత్యేక ప్రవేశ దర్శనం టికెట్ల బుకింగ్‌ నిలిచిపోయింది. ఆన్లైన్లో టికెట్ల కొనుగోలుకు భారీగా భక్తులు యత్నించడంతో సమస్య ఏర్పడినట్లు అధికారులు చెబుతున్నారు. అక్టోబర్ నెలకు ప్రత్యేక ప్రవేశం దర్శనం టికెట్లను తితిదే ఆన్లైన్లో విడుదల చేసింది. అక్టోబర్ 1 నుంచి 25 వరకు రోజుకు 8వేల టికెట్లు చొప్పున అందుబాటులో ఉంచింది. దీంతో పెద్ద ఎత్తున భక్తులు వాటిని కొనుగోలు చేసేందుకు ప్రయత్నించారు. ఈ క్రమంలో తితిదే వెబ్సైట్లో సాంకేతిక సమస్య ఏర్పడిందని అధికారులు తెలిపారు. గతంలోనూ పలుమార్లు ఇదే తరహా సమస్య వచ్చింది. దీన్ని పరిష్కరించేందుకు అధికారులు చర్యలు చేపట్టారు. సాంకేతిక సమస్యను పరిష్కరించిన తర్వాత ప్రత్యేక ప్రవేశదర్శనం టికెట్లపై తితిదే ప్రకటన చేసే అవకాశముంది. తిరుమలకు వచ్చే భక్తులు టీకా 2 డోసులు పూర్తైన సర్టిఫికెట్ లేక కరోనా నెగిటివ్ సర్టిఫికెట్ తీసుకురావాలని తితిదే అధికారులు స్పష్టం చేశారు.
టికెట్ల విడుదల సమయంలో కొన్ని నెలలుగా సాంకేతిక సమస్య(technical issue in ttd website) తలెత్తోందని భక్తులు చెబుతున్నారు. దీని పరిష్కారానికి గత నెలలో ఏపీ ప్రభుత్వ సర్వర్‌ను ఉపయోగించుకున్న తితిదే.. పరిష్కారానికి జియో సంస్థ సహకారం తీసుకుంది. అయినా సమస్య(technical issue in TTD website) పరిష్కారం కాకపోవడంతో భక్తులు ఆందోళన వ్యక్తం చేస్తున్నారు.
