కోడి మాంసం, గుడ్డు పూర్తిగా సురక్షితమని, వినియోగదారులు ఆందోళన చెందాల్సిన అవసరం లేదని అంతర్జాతీయ గుడ్డు కమిషన్‌ ఛైర్మన్‌ చిట్టూరి సురేష్‌రాయుడు అన్నారు. తెలుగు రాష్ట్రాల్లో బర్డ్‌ఫ్లూ ఆనవాళ్లు లేవని తెలిపారు. తెలంగాణ రాష్ట్ర పశుసంవర్ధక శాఖ మంత్రి తలసాని శ్రీనివాస్‌యాదవ్‌ కూడా ఇదే విషయాన్ని స్పష్టం చేశారని పేర్కొన్నారు. మన దేశంలో బర్డ్‌ ఫ్లూ కొత్తేం కాదని, రైతులు కోళ్ల ఫామ్‌లను సురక్షితంగా ఉంచుకుంటే వైరస్‌ సోకదని వివరించారు.
అక్కడి నుంచే వస్తుంది
సాధారణంగా చైనా, కజికిస్థాన్‌ వంటి దేశాల నుంచి వలస పక్షులు వచ్చిన ప్రతిసారి దేశంలో బర్డ్‌ఫ్లూ వస్తుంటుందన్నారు. చైనా, వియత్నాం వంటి దేశాల్లో కోళ్లతోపాటు పందులు, ఇతర జంతువులను కూడా పెంచుతున్న దృష్ట్యా.. ఆయా దేశాల్లో సులభంగా వైరస్‌ వ్యాప్తికి అవకాశాలు ఉంటాయని తెలిపారు. కొవిడ్‌-19 నేపథ్యంలో రోగ నిరోధక శక్తి పెరగాలంటే గుడ్డు, చికెన్‌ నిరభ్యంతరంగా తినవచ్చని ఈనాడు-ఈటీవీ భారత్ ఇంటర్వ్యూలో పేర్కొన్నారు.
దేశంలో బర్డ్‌ఫ్లూ ప్రభావం ఎలా ఉంది?
కేరళ, హిమాచల్‌ప్రదేశ్‌, హరియాణా రాష్ట్రాల్లో కోళ్లలో బర్డ్‌ఫ్లూ నిర్ధరణైంది. తెలుగు రాష్ట్రాల్లో బర్డ్‌ఫ్లూ కేసులు నమోదైనట్లు సమాచారం రాలేదు. భోపాల్‌లోని జాతీయ పశువ్యాధుల సంస్థ (ఎన్‌ఐహెచ్‌ఎస్‌ఏడీ) నుంచి అధికారికంగా సమాచారం వస్తే తప్ప ఏం చెప్పలేని పరిస్థితి. ఈ వ్యాధి నిర్ధారణకు దేశవ్యాప్తంగా ఇదొక్కటే ప్రయోగశాల ఉంది. ఇలాంటి వైరస్‌ తీవ్రత సమయాల్లో పరీక్షలు త్వరగా చేయాలి. ఆ వైరస్‌ ఏ ఫామ్‌లో వచ్చిందో తెలుసుకుని ఆ కోళ్లన్నింటినీ చంపేసి జాగ్రత్తగా పూడ్చేస్తే మరింత ప్రబలకుండా ఉంటుంది. వాస్తవానికి కోళ్ల నుంచి వైరస్‌ మనుషులకు సోకదు. ఇది శాస్త్రీయంగా రుజువైంది.
కోళ్ల పరిశ్రమపై ఎలాంటి ప్రభావం చూపుతుందని భావిస్తున్నారు?
2004, 2005 సంవత్సరాల్లో కూడా చూశాం. జనాల్ని భయపెడుతూనే ఉన్నారు. ఇప్పటికీ ఏం కాలేదు. కోడి మాంసం, గుడ్డు తినడం వల్ల ఎలాంటి ప్రమాదం లేదు. తినకపోతే రోగ నిరోధక శక్తి విషయంలో రాజీ పడ్డట్లే అవుతుంది. కొవిడ్‌ సోకినవారిలో చాలా మంది చికెన్‌, గుడ్లు తినడం వల్ల తొందరగా కోలుకోవడం చూశాం. బర్డ్‌ఫ్లూ నేపథ్యంలో వస్తున్న వదంతులు నిజం కాదని ప్రజలు అర్థం చేసుకుంటున్నారు. కోడి మాంసం, గుడ్డు శుభ్రంగా కడిగి కారం, మసాలాలు కలిపి ఉడికించిన తర్వాతే తింటాం కాబట్టి ఎవరికీ ఎలాంటి సమస్యా ఉండదు.
ప్రభుత్వం నుంచి ఏం ఆశిస్తున్నారు? పరిశ్రమ ఎలా సమాయత్తమవుతోంది?
ఇకనైనా ప్రయోగశాలలను, పర్యవేక్షణను పెంచాలి. అంతర్జాతీయంగా కోళ్లల్లో టీకాలు వేస్తున్నారు. భారత్‌లో అనుమతి లేదు. ఆ అనుమతి ఇస్తే ఇలాంటివి రాకుండా జాగ్రత్త పడవచ్చు. పక్షులు కోళ్ల ఫామ్‌ల్లోకి రాకుండా రైతులు చూసుకోవాలి. వలస పక్షులు ఎట్టి పరిస్థితుల్లోనూ రాకుండా చూడాలి. పొరపాటున అవి మేత కోసం వచ్చి వాలితే ప్రమాదం పొంచిఉన్నట్టే. ఫామ్‌ల వద్ద రైతులు విధిగా మాస్క్‌లు ధరించడం, లోపలకు వెళ్లేటప్పుడు శుభ్రంగా చేతులు కడుక్కోవడం, శానిటైజ్‌ చేసుకోవడం వంటి చర్యలు తీసుకోవాలి.
ఇదీ చదవండి : ఒక్కొక్కరికి 2 డోసులు... దుష్ఫలితాల కట్టడికి మూడంచెల ఏర్పాట్లు
