ఫైబర్ గ్రిడ్ ప్రాజెక్టు పరిధిని రాష్ట్రంలోని అన్ని పట్టణ ప్రాంతాలకూ విస్తరించాలని ఐటీ శాఖ మంత్రి కేటీఆర్ అధికారులను ఆదేశించారు. ప్రాజెక్టు విస్తరణలో భాగంగా గ్రేటర్ హైదరాబాద్ పరిధిలోనూ సర్వే చేసి నివేదిక ఇవ్వాలని సూచించారు.
హైదరాబాద్ టీ-హబ్లో జరిగిన ఫైబర్ గ్రిడ్ కార్పోరేషన్ బోర్డు సమావేశంలో పనుల పురోగతిని సమీక్షించారు. మిషన్ భగీరథ పనులు పూర్తైన గ్రామీణ ప్రాంతాల్లో టీ- ఫైబర్ పనులు పెద్ద ఎత్తున కొనసాగుతున్నాయని అధికారులు తెలిపారు. ఆగస్టు నాటికి ప్రతీ గ్రామానికి టీ-ఫైబర్ కనెక్టివిటీ ఇచ్చే లక్ష్యంతో పనిచేస్తున్నట్లు అధికారులు వివరించారు.
ప్రతి ఇంటికీ ఇంటర్నెట్ ఇవ్వాలన్న దీర్ఘకాలిక లక్ష్యంతో పనిచేస్తున్నామన్న కేటీఆర్.. రాష్ట్రంలోని 30 వేల ప్రభుత్వ కార్యాలయాలకు జూన్ నుంచి ప్రాధాన్యత క్రమంలో కనెక్షన్ ఇవ్వాలని ఆదేశించారు. ముఖ్యమంత్రి కేసీఆర్ సూచనల మేరకు రాష్ట్రంలోని అన్ని రైతు వేదికలను టీ-ఫైబర్‌తో అనుసంధానించాలన్నారు. ఇప్పటికే ప్రయోగాత్మకంగా 5 రైతు వేదికలకు కనెక్షన్ ఇచ్చినట్లు అధికారులు తెలిపారు. బోర్డు ఆదేశాల మేరకు టీ-ఫైబర్‌ను మరింత వేగంగా ముందుకు తీసుకెళ్లేందుకు కృషి చేస్తామని అధికారులు వెల్లడించారు.
ఇవీచూడండి: బడ్జెట్ ధరలో హెచ్పీ 'క్రోమ్‌బుక్‌ 11ఏ'
