Hc On Hcu Lands: హైదరాబాద్ కేంద్రీయ విశ్వవిద్యాలయం భూములపై హైకోర్టు కీలక తీర్పు వెల్లడించింది. ప్రభుత్వం కేటాయించిన భూములపై హెచ్సీయూకి చట్టబద్ధ హక్కులు లేవని పేర్కొంది. గచ్చిబౌలి ఎన్జీవో కాలనీ కోసం జీహెచ్ఎంసీ నిర్మిస్తున్న రోడ్డుపై హెచ్సీయూ గతంలో హైకోర్టును ఆశ్రయించింది. తమ భూములను ఆక్రమించి రోడ్డు నిర్మిస్తున్నారని హెచ్సీయూ వాదించింది. అన్ని వైపుల వాదనలు విన్న హైకోర్టు.. ఆ భూములు హెచ్సీయూవే అనేందుకే చట్టబద్ధమైన ఆధారాలే లేవని తేల్చింది.
ప్రభుత్వం వద్దే భూమి..
హెచ్సీయూ కోసం 1975లో రాష్ట్ర ప్రభుత్వం 2 వేల 324 ఎకరాలను కేటాయించింది. అయితే భూములపై హక్కులు కల్పిస్తూ ఉత్తర్వులు లేవని హైకోర్టు పేర్కొంది. తమకు మరోచోట భూమిని కేటాయించాలంటూ ప్రభుత్వంతో ఒప్పందం చేసుకొని.. 2013లో క్రీడా అకాడమీ ఏర్పాటు కోసం 500 ఎకరాలను హెచ్సీయూ ఐఎంజీ అకాడమీస్ భారత్ ప్రైవేట్ లిమిటెడ్కు కేటాయించింది. ఆ తర్వాత ఐఎంజీని భూములను ప్రభుత్వం వెనక్కి తీసుకోవడంతో.. వివాదం ఏర్పడింది. ఆ వివాదంలోనూ హెచ్ సీయూ ప్రతివాదిగా లేదంటే.. భూమి ప్రభుత్వం వద్దే ఉన్నట్లని హైకోర్టు పేర్కొంది.
సివిల్ కోర్టును ఆశ్రయించవచ్చు..
తమకు 500 ఎకరాలు పోగా మిగిలిన భూమిని చట్టబద్ధంగా కేటాయించాలని 2013లో ప్రభుత్వాన్ని హెచ్సీయూ కోరింది. ప్రభుత్వం నియమించిన ఉన్నతస్థాయి కమిటీ హెచ్సీయూకి 1626 ఎకరాలు కేటాయించి... 159 ఎకరాలు ప్రజా ప్రయోజనాల కోసం రిజర్వ్లో ఉంచాలని సిఫార్సు చేసింది. రిజర్వ్ చేయాలని కమిటీ సిఫార్సు చేసిన భూముల్లోనే ప్రస్తుత రోడ్డు నిర్మాణం జరుగుతోదంని తీర్పులో హైకోర్టు పేర్కొంది. రోడ్డు నిర్మాణం కోసం అవసరమైతే భూసేకరణ చేయాలన్న హెచ్సీయూ వాదనను ఉన్నత న్యాయస్థానం తోసిపుచ్చింది. చట్టబద్ధమైన హక్కులే లేనప్పుడు భూసేకరణ ప్రశ్నే తలెత్తదని పేర్కొంది. ఎన్జీవో కాలనీలో ఇప్పటికే విశాలమైన రోడ్డు ఉన్నందున.. ప్రస్తుతం నిర్మిస్తున్న రహదారి అవసరం లేదన్న వాదననూ ఉన్నత న్యాయస్థానం తోసిపుచ్చింది. రోడ్డు ఎక్కడ నిర్మించాలనేది విశాల ప్రయోజనాలను దృష్టిలో ప్రభుత్వమే నిర్ణయిస్తుందని స్పష్టం చేసింది. రికార్డుల్లో పోరంబోకు భూమిగా ఉన్నందున ప్రభుత్వం జీహెచ్ఎంసీకి కేటాయించిందని తెలిపింది. హెచ్సీయూ పిటిషన్ను కొట్టివేసిన హైకోర్టు న్యాయమూర్తి జస్టిస్ షమీమ్ అఖ్తర్.. భూములపై హక్కుల కోసం సివిల్ కోర్టును ఆశ్రయించవచ్చునని తీర్పులో హెచ్సీయూకి సూచించారు.
ఇదీ చూడండి:
