CM KCR District Tour: సమీకృత కలెక్టరేట్ సముదాయాలు పూర్తయిన చోట ప్రారంభోత్సవాలకు ముఖ్యమంత్రి కేసీఆర్ సిద్ధమవుతున్నారు. డిసెంబర్ నెలలోనే జిల్లాల కలెక్టరేట్ భవనాలను ప్రారంభించాలని సీఎం నిర్ణయించారు. అయితే ధాన్యం కొనుగోళ్ల అంశం కారణంగా అప్పుడు జరగలేదు. ఆ కార్యాలయాలను ఇప్పుడు ప్రారంభించాలని ముఖ్యమంత్రి నిర్ణయించినట్లు తెలిసింది.
వీలును బట్టి ఇతర జిల్లాల్లోనూ..
ఈనెల 11న జనగామతో కేసీఆర్ పర్యటన ప్రారంభం కానుంది. జనగామ జిల్లా కలెక్టరేట్ కార్యాలయం, తెరాస కార్యాలయ ప్రారంభానికి ముహూర్తం ఖరారైంది. ఆ రోజు బహిరంగ సభలోనూ ప్రసంగించనున్నారు. ఆ తరువాత వీలును బట్టి ఇతర జిల్లాల్లోనూ ప్రారంభోత్సవాలు ఉండే అవకాశం ఉంది. యాదాద్రి భువనగిరి, వనపర్తి, నిజామాబాద్, జగిత్యాల, వికారాబాద్‌లో సమీకృత కలెక్టరేట్లు ప్రారంభోత్సవానికి సిద్ధంగా ఉన్నాయి. పలు జిల్లాల్లో పార్టీ కార్యాలయాలు కూడా సిద్ధమయ్యాయి.
15న కమాండ్ కంట్రోల్ సెంటర్..
అటు హైదరాబాద్‌లో రాష్ట్ర ప్రభుత్వం అత్యాధునికంగా నిర్మించిన కమాండ్ కంట్రోల్ సెంటర్‌ను ముఖ్యమంత్రి కేసీఆర్ త్వరలో ప్రారంభించనున్నారు. పనులన్నీ పూర్తయిన నేపథ్యంలో ప్రారంభోత్సవానికి ఏర్పాట్లు చేస్తున్నారు. ఈనెల 15న కమాండ్ కంట్రోల్ సెంటర్‌ను కేసీఆర్ ప్రారంభిస్తారని అంటున్నారు. మేడారం జాతర సందర్భంగా ఇక్కణ్ణుంచే పర్యవేక్షించే వ్యవస్థను అందుబాటులోకి తీసుకొచ్చేందుకు సన్నాహాలు చేస్తున్నట్లు చెబుతున్నారు.
ఇదీచూడండి: సీఎంకు ఆ పోస్టులు చూపించిన పోలీసులు! ఇక వాళ్లకి దబిడ దిబిడేనా?
