భాజపా తెలంగాణ వ్యవహారాల బాధ్యునిగా తరుణ్‌ చుగ్‌ నియమితులయ్యారు. ఇప్పటి వరకు రాష్ట్ర బాధ్యునిగా ఉన్న కృష్ణదాస్‌ను ఆ బాధ్యతల నుంచి తప్పించారు. అన్ని రాష్ట్రాలు, కేంద్ర పాలిత ప్రాంతాల బాధ్యులు, సహ బాధ్యులను నియమిస్తూ ఆ పార్టీ జాతీయ అధ్యక్షుడు జేపీ నడ్డా జారీ చేసిన జాబితాను ఆ పార్టీ జాతీయ ప్రధాన కార్యదర్శి అరుణ్‌ సింగ్‌ శుక్రవారం విడుదల చేశారు. పంజాబ్‌కు చెందిన తరుణ్‌చుగ్‌ ఏబీవీపీ, భారతీయ జనతా యువమోర్చాల్లో వివిధ హోదాల్లో పని చేశారు. ఆ పార్టీ జాతీయ కార్యదర్శిగా ఇటీవల నియమితులయ్యారు.
దుబ్బాక ఉప ఎన్నికలో గెలుపుతో దూకుడుగా ఉన్న పార్టీకి మరింత ఉత్సాహం నింపేందుకే చుగ్‌ వంటి చురుకైన నేతను నియమించారని ఆ పార్టీ ముఖ్య నేత ఒకరు తెలిపారు. త్వరలో జీహెచ్‌ఎంసీ ఎన్నికలున్న నేపథ్యంలో కొత్త బాధ్యుని నియామకం ప్రాధాన్యం సంతరించుకుంది. ఇటీవల జాతీయ కార్యవర్గంలో చోటుదక్కని పార్టీ సీనియర్‌ నేత మురళీధర్‌రావును మధ్యప్రదేశ్‌ వ్యవహారాల ఇన్‌ఛార్జిగా నియమించారు.
పార్టీ జాతీయ ఉపాధ్యక్షురాలిగా నియమితులైన డి.కె.అరుణను కర్ణాటక రాష్ట్ర వ్యవహారాల సహా బాధ్యురాలిగా, ఇటీవలే పార్టీలో చేరిన మాజీ ఎమ్మెల్సీ పొంగులేటి సుధాకర్‌రెడ్డిని తమిళనాడు సహ బాధ్యునిగా నియమించారు. జాతీయ కార్యవర్గంలో ఏదో ఒక హోదాలో ఉన్న నేతలనే భాజపాలో రాష్ట్ర వ్యవహారాల బాధ్యులు, సహ బాధ్యులుగా నియమిస్తారు. మురళీధర్‌రావు, సుధాకర్‌రెడ్డి జాతీయ కార్యవర్గంలో లేనప్పటికీ బాధ్యతలు అప్పగించారు. తరుణ్‌ చుగ్‌కు జాతీయ యువమోర్చా బాధ్యునిగానూ నియమించారు.
ఇదీ చదవండి: పెద్దల సభకు వెళ్తున్న ఈ ముగ్గురి నేపథ్యం తెలుసా...?
