ఆంధ్రప్రదేశ్లోని చిత్తూరు జిల్లా కుప్పం మున్సిపాలిటీ(Kuppam Elections) ఎన్నిక పోలింగ్‌లో దొంగ ఓట్లు వేసేందుకు ప్రయత్నిస్తున్న కొందరు యువకులను ఏజెంట్లు పట్టుకున్నారు. 18, 19వార్డుల్లో దొంగ ఓట్లు వేసేందుకు యత్నిస్తుండగా స్థానిక ఏజెంట్లు వారిని గుర్తించి పోలీసులకు అప్పగించారు. యువకులను కడప జిల్లా రాయచోటికి చెందిన వారిగా గుర్తించారు. మరోవైపు కుప్పంలోని కొత్తపేట జూనియర్‌ కళాశాల పోలింగ్‌ కేంద్రంలో ఉద్రిక్తత నెలకొంది. ఓటర్లు కానివారికి స్లిప్పులు ఇస్తున్నారంటూ తెదేపా శ్రేణులు నిరసన తెలియజేశాయి. దీంతో పోలీసులు ఇరు వర్గాలను చెదరగొట్టారు.
అనంతపురం జిల్లా పెనుగొండ నగర పంచాయతీ పోలింగ్‌(Kuppam Elections)లో స్వల్ప ఉద్రిక్తత చోటు చేసుకుంది. పోలింగ్‌ కేంద్రంలోకి వెళ్లేందుకు ఎంపీ గోరంట్ల మాధవ్‌ ప్రయత్నించగా.. అక్కడే ఉన్న తెదేపా మాజీ ఎమ్మెల్యే పార్థసారథి అడ్డుకున్నారు. దీంతో ఇరువురి మధ్య వాగ్వాదం నెలకొంది. పోలీసులు వారికి సర్దిజెప్పి అక్కడి నుంచి పంపించారు.
వీడియోలను బయటపెట్టిన తెదేపా..
కుప్పం మున్సిపాలిటీకి జరిగే ఎన్నికల్లో అధికార వైకాపా దొంగ ఓట్లు వేయిస్తోందంటూ తెదేపా కొన్ని వీడియోల(Kuppam Elections)ను విడుదల చేసింది. తంబాలపల్లి, తుంగనూరు ప్రాంతాలనుంచి పెద్ద ఎత్తున స్థానికేతరులను కుప్పానికి తీసుకువచ్చి ఎన్నికల్లో అక్రమాలకు పాల్పడుతున్నారని ఆరోపించింది. దొంగ ఓట్లు వేసుందుకు వచ్చేవారు అడిగితే తమ గుర్తింపు కార్డులు చూపించకపోగా.. తప్పించుకు పారిపోతున్నారంటూ వీడియోలను తెదేపా నేతలు బయటపెట్టారు.
దొంగ ఓట్లు వేయించారు.. అడిగితే దాడి చేశారు..
కుప్పం(Kuppam Elections) మున్సిపాలిటీలో దొంగ ఓట్లు వేసిన స్థానికేతరులను ప్రశ్నించిన తెదేపా నాయకుడిపై.. వైకాపా నేతలు దాడి చేశారు. ఈ ఘటనలో యువకుడు తీవ్రంగా గాయపడ్డాడని తెదేపా నాయకులు తెలిపారు.
