కృష్ణా నది-పెండింగ్ ప్రాజెక్టులు అనే అంశంపై టీ-జర్నలిస్ట్ ఫోరం ఆద్వర్యంలో... అఖిలపక్ష సమావేశం జరిగింది. టీ-జర్నలిస్ట్ ఫోరం అధ్యక్షుడు పల్లె రవికుమార్ అధ్యక్షతన జరిగిన ఈ సమావేశానికి కాంగ్రెస్ నేతలు రేవంత్ రెడ్డి , వంశీచంద్ రెడ్డి, తెదేపా రాష్ట్ర అధ్యక్షుడు ఎల్.రమణ, తెలంగాణ జన సమితి అధ్యక్షుడు ఆచార్య కోదండరాం, భాజపా నేతలు జితేందర్ రెడ్డి, వివేక్ హాజరయ్యారు. పోతిరెడ్డిపాడు ఆపడం కోసం తెలంగాణలోని అన్ని పక్షాలు ఏకం కావాల్సిన అవసరం ఉందని అఖిలపక్ష నేతలు అభిప్రాయపడ్డారు.
ఎన్నికల్లో జగన్కు ఇచ్చిన డబ్బుల కోసమే పోతిరెడ్డిపాడు విషయంలో కేసీఆర్ చూసి చూడనట్లు ఆరోపించారు. దక్షిణ తెలంగాణ ఎడారి అయ్యే అవకాశం ఉన్నందున... ప్రజా ఉద్యమాలతో పోతిరెడ్డిపాడును ఆపాలని అఖిలపక్ష నేతలు నిర్ణయించారు. ఉత్తర తెలంగాణ ప్రాజెక్టులు వేగవంతంగా పూర్తి చేసి దక్షిణ తెలంగాణ ప్రాజెక్టులో పురోగతి లేకుండా చేశారని విమర్శించారు. 70 శాతం పూర్తి అయిన దక్షిణ తెలంగాణ ప్రాజెక్టులను విస్మరించి... నిధులు మొత్తం కాళేశ్వరానికి ఖర్చు పెట్టడం వల్ల దక్షిణ తెలంగాణ తీవ్రంగా నష్టపోయిందన్నారు.
ఇప్పుడెందుకు వ్యతిరేకించరు..?
తెలంగాణ ఉద్యమంలో పాల్గొన్న ఏ ఒక్కరూ ముఖ్యమంత్రి కేసీఆర్ పక్కన లేరని... తనకు అడ్డు వచ్చిన వారిని తొలగిస్తూ ఉద్యమ ద్రోహులను కేసీఆర్ అక్కున చేర్చుకుంటున్నారని రేవంత్ రెడ్డి విమర్శించారు. కేసీఆర్ చరిత్రను చెరిపి రీడిజైన్ల పేరుతో తన చరిత్రను రాసుకునే ప్రయత్నం చేస్తున్నారని ఎద్దేవా చేశారు. కేసీఆర్ ముందు... కేసీఆర్ తర్వాత అన్నట్టు చరిత్రను చూపే ప్రయత్నం జరుగుతుందన్నారు. పోతిరెడ్డిపాడుకు వైఎస్సాఆర్ శంకుస్థాపన చేస్తే... జగన్ దాన్ని పూర్తి చేసేలా ఉన్నాడని... అప్పుడు వ్యతిరేకించిన కేసీఆర్... ఇప్పుడు జగన్ నిర్ణయాన్ని ఎందుకు వ్యతిరేకించట్లేదో సమాధానం చెప్పాలని డిమాండ్ చేశారు.
ఉద్యమాలతో మహబూబ్నగర్ ప్రాజెక్టులు పూర్తి చేసుకోవాల్సిన బాధ్యత రాజకీయ పార్టీలు, ప్రజలపై ఉందని... అందరూ కలసి భవిష్యత్ కార్యాచరణను రూపొందించాలి. దక్షిణ తెలంగాణ నష్టపోవడానికి కేసీఆర్ ప్రధాన కారణమనే విషయాన్ని ప్రజల్లోకి తీసుకెళ్లాలి. అందుకు తగిన కార్యచరణ రూపొందించేందుకు టీ-జర్నలిస్ట్ ఫోరం సిద్ధంగా ఉంది.
- పల్లె రవి కుమార్, టీ-జర్నలిస్ట్ ఫోరం అధ్యక్షుడు
ఇదీ చూడండి: అసెంబ్లీ అంటే అల్లర్లు, దూషణలు కాదు: సీఎం కేసీఆర్
