KTR on Swachh Survekshan Awards: కేంద్ర ప్రభుత్వం ప్రకటించిన స్వచ్ఛ సర్వేక్షణ్, ఇండియన్ స్వచ్ఛతా లీగ్లో అవార్డులు అందుకొన్న పట్టణ ప్రాంత ప్రజాప్రతినిధులు, అధికారులకు రాష్ట్ర ప్రభుత్వం అభినందన సమావేశం నిర్వహించింది. హైదరాబాద్ మర్రిచెన్నారెడ్డి మానవవనరుల అభివృద్ధి కేంద్రంలో జరిగిన సమావేశానికి ఆయా పట్ణణాల మేయర్లు, ఛైర్ పర్సన్లు, డిప్యూటీలు, కమిషనర్లు, ఇంజనీర్లు, సంబంధిత జిల్లాల స్థానిక సంస్థల అదనపు కలెక్టర్లు హాజరయ్యారు. పురపాలకశాఖ మంత్రి కేటీఆర్ వారిని అభినందించారు.
స్వచ్ఛ సర్వేక్షణ్లో 13 పట్టణాలకు కేంద్ర అవార్డులు రాగా... ఇండియన్ స్వచ్ఛతా లీగ్లో మరో మూడు అవార్డులు లభించాయి. ఈ ఏడాది 25 అవార్డులు రావాలని నిరుడు మంత్రి ఇచ్చిన లక్ష్యాన్ని చేరుకోలేకపోయామన్న పురపాలక సంచాలకులు సత్యనారాయణ... ఎక్కువ అవార్డులతో జాతీయ స్థాయిలో రెండో స్థానాన్ని సంపాదించినట్లు చెప్పారు. మరింత గట్టిగా కృషి చేసి వచ్చే ఏడాది మరిన్ని ఎక్కువ అవార్డులు వచ్చేలా ప్రయత్నిస్తామని అన్నారు. రాష్ట్రం మంచి పనితీరు కనబరచినప్పటికీ లక్షకు పైగా జనాభా ఉన్న పట్టణాల్లో ఒక్క అవార్డు కూడా రాలేదన్న పురపాలకశాఖ ప్రత్యేక ప్రధాన కార్యదర్శి అర్వింద్ కుమార్... జీహెచ్ఎంసీ సహా చాలా పట్టణాల్లో తక్కువ మార్కులతో అవార్డులను కోల్పోయామని అన్నారు. ఓడీఎఫ్ ప్లస్ ప్లస్ హోదా అన్ని పట్టణాలకు వచ్చేలా చూడాలని, చెత్త సేకరణ ప్రక్రియను ఇంకా పకడ్బందీగా చేయాల్సి ఉందని సూచించారు.
దేశంలోనే రెండో అత్యధిక అవార్డులు వచ్చిన రాష్ట్రంగా తెలంగాణ ఉండడం గర్వకారణమన్న పురపాలకశాఖ మంత్రి కేటీఆర్... మొదటి స్థానంలో ఉన్న మహారాష్ట్రకు 4.92 శాతం అవార్డులు వస్తే రాష్ట్రానికి పది శాతానికి పైగానే వచ్చాయని తెలిపారు. గ్రామాలు, పట్టణాలు అన్నీ బాగానే ఉన్నాయని కేంద్రమే చెబుతూ అవార్డులు ఇస్తూనే... మళ్లీ పనికిమాలిన మాటలు కూడా వాళ్లే మాట్లాడుతుంటారని ఆక్షేపించారు. క్షేత్రస్థాయిలో మార్పు స్పష్టంగా కనిపిస్తోందన్న ఆయన... ఇంకా చాలా చేయాల్సి ఉందని అన్నారు. అవార్డులు దక్కించుకున్న 19 పట్టణాలకు రెండు కోట్ల రూపాయలు చొప్పున ప్రోత్సాహకాన్ని ప్రకటించిన మంత్రి... ఆ నిధులను పారిశుద్ధ్యం కోసం వినియోగించేలా చూడాలని చెప్పారు. అవార్డులు పొందిన పట్టణాల మేయర్లు, చైర్ పర్సన్లు, కమిషనర్లను దేశంలోని ఇతర పట్టణాల్లో అధ్యయనానికి పంపిస్తామని... అందులో పది మందిని ఎంపిక చేసి జపాన్, సింగపూర్ కు పంపిస్తామని తెలిపారు.
ఇండోర్కు అవార్డు వస్తే ప్రజలు సంబరాలు చేసుకున్నారన్న కేటీఆర్... ఆ తరహాలో ప్రజల్లో సమష్టి ఆలోచనను రేకెత్తించడానికి అందరమూ కృషి చేయాలని పిలుపునిచ్చారు. నెలకోమారు శ్రమదానం ఎందుకు చేయరని బాసర ట్రిపుల్ ఐటీ విద్యార్థులను తాను ప్రశ్నించానన్న ఆయన... నిన్న ఆ విద్యార్థులు శ్రమదానం చేసి క్యాంపస్ను శుభ్రం చేసుకున్నారని వివరించారు. 2019 తర్వాత రిజిస్ట్రేషన్లకు సంబంధించి 75 గజాల్లో ఇళ్ల అనుమతుల కోసం టీఎస్ బీపాస్లో ఉన్న సమస్యను పరిష్కరిస్తామని మంత్రి హామీ ఇచ్చారు. మున్సిపల్ వర్కర్లకు ఎక్కడ కూడా 12వేల వేతనం తగ్గరాదని స్పష్టం చేశారు. వ్యర్థాల నిర్వహణ విషయంలో రాష్ట్రం చేస్తున్న పనులు, చెప్పిన అంశాలను పరిగణలోకి తీసుకోకుండా ఎన్జీటీ రాష్ట్రానికి జరిమానా విధించిందన్న మంత్రి కేటీఆర్... అన్ని అంశాలను ఎన్జీటీ దృష్టికి తీసుకెళ్తామని అధికారులు చెప్పారని తెలిపారు.
ఒక్క సిరిసిల్ల పట్టణంలోనే చెత్త ద్వారా నెలకు ఎనిమిది లక్షల రూపాయల ఆదాయం వస్తుందన్న మంత్రి... చెత్త ద్వారా ప్రతి పట్టణానికి అదనపు ఆదాయం వస్తుందని దానిపై దృష్టి సారించాలని సూచించారు. మానవ వ్యర్థాల శుద్ధి దేశంలో తెలంగాణ తప్ప ఎవరూ చేయడం లేదన్న ఆయన... మున్సిపల్లో చెత్త తప్ప గ్లామర్ ఉండదని వ్యాఖ్యానించారు. ఎంత బాగా చేసినా ప్రశంసించరు కానీ, చిన్న లోపం ఉన్నా దారుణంగా తిడతారని... అందరూ కష్టపడి పట్టణాలకు, తెలంగాణకు మంచిపేరు తీసుకురావాలని కేటీఆర్ విజ్ఞప్తి చేశారు.
'దేశంలోనే రెండో అత్యధిక అవార్డులు వచ్చిన రాష్ట్రంగా తెలంగాణ. మిగతా రాష్ట్రాలకు తెలంగాణ దిక్సూచిగా నిలిచింది. పారిశుద్ధ్యంపై దృష్టి సారిస్తే అవార్డులు వెతుక్కుంటూ వస్తాయి. మున్సిపల్ కార్మికులకు రూ.12వేల వేతనం తగ్గరాదు. కార్మికుల శ్రేయస్సు, రక్షణ పరికరాలు తప్పనిసరిగా ఇవ్వాలి. పట్టణాల్లో 3,712 మంది వార్డు ఆఫీసర్లను నియమిస్తున్నాం. ఎన్జీటీ రాష్ట్రానికి జరిమానా విధించింది. చెత్త ద్వారా ప్రతి పట్టణానికి అదనపు ఆదాయం వస్తోంది. సిరిసిల్లలో చెత్త ద్వారా నెలకు రూ.8 లక్షల ఆదాయం వస్తోంది. అత్యుత్తమంగా పనిచేసే మున్సిపాలిటీలకు ఈసారి అవార్డులు రాలేదు. దక్షిణాదిలో 20కి గాను 15 అవార్డులు తెలంగాణకే వచ్చాయి.' -కేటీఆర్, పురపాలక శాఖ మంత్రి
ఇవీ చదవండి:
