రంగారెడ్డి జిల్లా మంచాల మండలం ఆరుట్లకు చెందిన రైతు.. వినపల్లి శ్రీనివాస్ రెడ్డి ఆరేళ్లుగా డ్రాగన్ ఫ్రూట్ సాగు చేస్తున్నారు. విదేశాల నుంచి దిగుమతి చేసుకునే ఈ పండును మన రాష్ట్రంలోనే ఎందుకు పండిచట్లేదని ప్రశ్న.. శ్రీనివాస్రెడ్డి మొదడులో తలెత్తింది. ఎలాగైనా ఈ పండును ఇక్కడ కూడా పండించాలని నిశ్చయించుకున్నారు. డ్రాగన్ ఫ్రూట్ పంటకు సంబంధించిన అనేక పరిశోధనలు, మెలకువలు తెలుసుకున్నారు. సాధారణ వర్షాపాతంతోనే పండే ఈ పంటను సాగు చేయటం ప్రారంభించారు.
ఉద్యోగాన్ని సైతం వదిలేసి...
తాను అనుకున్నట్టుగా డ్రాగన్ ఫ్రూట్ను ఇక్కడే పండించాలన్న లక్ష్యాన్ని ఛేదించారు. డ్రాగన్ ఫ్రూట్ సాగులో విజయం సాధించారు. పంటపై మంచి లాభాలు గడిస్తున్నారు. వ్యవసాయ రంగంలో ముందుకు సాగి ఇతర రైతులను ప్రోత్సాహించడం కోసం.. తన ప్రభుత్వ ఉద్యోగాన్ని కూడా వదిలేశారు శ్రీనివాస్ రెడ్డి. ఈ సాగుపై తాను సాధించిన విజయ పాఠాలను రైతులతో పంచుకుంటున్నారు. ఎన్నో సార్లు... డ్రాగన్ ఫ్రూట్ సాగుపై రైతుల్లో అవగాహన కల్పించారు.
ఏ భూమిలోనైనా పండే పండు...
"తక్కువ వర్షపాతం ఉన్న ప్రాంతాలు కూడా డ్రాగన్ ఫ్రూట్ సాగుకు అనుకూలమే. 10 డిగ్రీల ఉష్ణోగ్రతల నుంచి 40 డిగ్రీల ఉష్ణోగ్రత వరకు ఉన్న ప్రాంతాల్లో కూడా ఈ సాగు చేసుకోవచ్చు. నల్లరేగడి భూములు తప్ప మిగతా ఏ భూముల్లోనైన ఈ పండును పండించొచ్చు. మార్కెట్లో ఈ పండుకు కిలోకు దాదాపు 150 నుంచి 200 వరకు పలుకుతోంది. ఈ పంటను సాగు చేయడానికి మొదట్లో ఎకరాకు 4 నుంచి 5 లక్షల వరకు ఖర్చు అవుతుంది. ఏడాది తర్వాత నుంచి మంచి లాభాలు వస్తాయి."- శ్రీనివాస్రెడ్డి, రైతు
లాభాల పంట పండిద్దాం...
ఎడారి మొక్క కావడం వల్ల పంటకు తెగులు కూడా సోకే ప్రమాదం చాలా తక్కువ అని శ్రీనివాస్రెడ్డి చెబుతున్నారు. మందులు పిచికారి చేయాల్సిన అవసరం లేకుండా.. సేంద్రీయ పద్ధతిలో ఈ సాగు చేయవచ్చంటున్నారు. మొక్క ఎదిగిన సంవత్సరం నుంచే.. పండ్లు చేతికి వస్తాయన్నారు. అనేక పోషకాలు, ఔషధ గుణాలు ఉండి.. మంచి లాభాలు తెచ్చిపెట్టే.. ఈ డ్రాగన్ ఫ్రూట్ను సాగు చేసేందుకు రైతులు ముందుకు రావాలని శ్రీనివాస్రెడ్డి కోరుతున్నారు.
