'ప్రజాప్రతినిధుల కోర్టు'లో రేవంత్​రెడ్డి, అసదుద్దీన్​కు ఊరట

పలువురు ప్రజాప్రతినిధులపై నమోదైన కేసులపై నాంపల్లిలోని ప్రత్యేక ప్రజా ప్రతినిధుల కోర్టులో విచారణ జరిగింది. రేవంత్​, అసద్దుద్దీన్​కు ఊరట లభించింది. ఎమ్మెల్యే బాజిరెడ్డి గోవర్ధన్​ కేసులో నిజామాబాద్​ రూరల్​ పోలీసులకు సమన్లు జారీచేసింది.

కాంగ్రెస్ ఎంపీ రేవంత్ రెడ్డిపై గత అసెంబ్లీ ఎన్నికల సమయంలో నమోదైన నాలుగు కేసులు హైదరాబాద్​లోని ప్రజాప్రతినిధుల కోర్టులో వీగిపోయాయి. ఎన్నికల నిబంధనలు ఉల్లంఘించారన్న అభియోగాలపై కొడంగల్, మద్దూరు పోలీస్ స్టేషన్లలో నమోదైన కేసులకు సరైన సాక్ష్యాధారాలు లేకపోవడం వల్ల కొట్టివేసింది.

ఎంపీలు, ఎమ్మెల్యేలపై క్రిమినల్ కేసుల విచారణకు నాంపల్లిలోని ప్రత్యేక న్యాయస్థానానికి ఎంపీలు బండి సంజయ్, అసదుద్దీన్ ఒవైసీ, రేవంత్ రెడ్డి, ఎమ్మెల్యేలు హరిప్రియ నాయక్, గూడెం మహిపాల్ రెడ్డి, ముఠా గోపాల్, సీతక్క, మాజీ ఎమ్మెల్యే కొండా సురేఖ తదితరులు హాజరయ్యారు.

నాన్ బెయిలబుల్ వారంట్ వెనక్కి..

ఎంపీ అసదుద్దీన్ ఒవైసీపై గతంలో జారీచేసిన నాన్ బెయిలబుల్ వారంట్​ను న్యాయస్థానం ఉపసంహరించింది. పాతబస్తీ మీర్​పేటలో 2016 జీహెచ్ఎంసీ ఎన్నికల సందర్భంగా కాంగ్రెస్ నేతలపై దాడి ఘటనకు సంబంధించిన కేసులో అసదుద్దీన్ హాజరు కాకపోవడం వల్ల గతంలో ఎన్​బీడబ్ల్యూ జారీ చేసింది. సోమవారం జరిగిన విచారణకు హాజరైన అసదుద్దీన్.. వారంట్ వెనక్కి తీసుకోవాలని కోరడాన్ని కోర్టు అంగీకరించింది.

పోలీసులపై ఆగ్రహం..

ఎమ్మెల్యే బాజిరెడ్డి గోవర్ధన్​పై నాన్​బెయిలబుల్ వారంట్ అమలు చేయకపోవడంపై నిజామాబాద్ రూరల్ పోలీసులపై ప్రజాప్రతినిధుల కోర్టు ఆగ్రహం వ్యక్తం చేసింది. పోలీసుల తరఫున ఎవరూ హాజరుకాకపోవడంపై నిజామాబాద్ రూరల్ ఎస్​హెచ్ఓకు సమన్లు జారీచేసింది. ఫిబ్రవరి 8న విచారణకు రావాలని ఆదేశించింది.

ఎన్నికలకు సంబంధించిన మూడు కేసుల్లో ఫిబ్రవరి 2న విచారణకు హాజరుకావాలని కొత్తగూడెం ఎమ్మెల్యే వనమా వెంకటేశ్వరరావుకు న్యాయస్థానం సమన్లు జారీ చేసింది.

ఇవీచూడండి: హైదరాబాద్​లో రైతుల ర్యాలీకి హైకోర్టు అనుమతి