'మెడికల్​ కౌన్సిలింగ్​పై రాష్ట్రపతిని కలుస్తాం'

హైదరాబాద్​లో జాతీయ బీసీ సంక్షేమ సంఘం ఆధ్వర్యంలో అఖిలపక్ష సమావేశం నిర్వహించారు. మెడికల్​ కౌన్సిలింగ్​లో విద్యార్థులకు జరుగుతున్న అన్యాయంపై పోరుబాటు సాగిస్తామని తెలిపారు. రాష్ట్ర ప్రభుత్వం మొండి వైఖరి వీడకపోతే ప్రజలే బుద్ధి చెబుతారన్నారు.

మెడికల్ కౌన్సిలింగ్​లో ఎస్సీ, ఎస్టీ, బీసీ విద్యార్థులకు జరుగుతున్న అన్యాయంపై రాష్ట్రపతిని కలుస్తామని అఖిలపక్షం నేతలు తెలిపారు. జాతీయ బీసీ సంక్షేమ సంఘం ఆధ్వర్యంలో హైదరాబాద్ బషీర్​బాగ్​లో అఖిలపక్ష సమావేశం నిర్వహించారు. భాజపా సీనియర్ నేత బండారు దత్తాత్రేయ, కాంగ్రెస్ సీనియర్ నేత మల్లు రవి, జాతీయ బీసీ సంక్షేమ సంఘం అధ్యక్షుడు ఆర్.కృష్ణయ్యతో పాటు పలు సంఘాల నేతలు పాల్గొన్నారు.

రాష్ట్ర ప్రభుత్వ వైఫల్యం కారణంగా మెడికల్ కౌన్సిలింగ్​లో అన్యాయం జరిగిందని బండారు దత్తాత్రేయ విమర్శించారు. జీవో 550ను సక్రమంగా అమలుచేయాల్సిన అధికారులు నిర్లక్ష్యంగా వ్యవహరించాలని మండిపడ్డారు. సమస్య పరిష్కారానికి అవసరమైతే రాష్ట్రపతిని కలుస్తామన్నారు.

మెడికల్ కౌన్సిలింగ్​లో విద్యార్థులకు జరుగుతున్న అన్యాయంపై చర్చించేందుకు ప్రభుత్వం సిద్ధమా.. అని ఆర్​. కృష్ణయ్య సవాల్​ విసిరారు. నిబంధనలకు విరుద్ధంగా కాళోజీ ఆరోగ్య విద్యాలయం అధికారులు వ్యవహరిస్తున్నారని ఆరోపించారు. సమస్య పరిష్కారం కోసం పోరుబాట పడతామని కాంగ్రెస్​ నేత మల్లు రవి వెల్లడించారు.

ఇవీ చూడండి: త్రివర్ణ కాంతులతో మెరిసిపోతున్న భాగ్యనగరం