ప్రొఫెసర్ జయశంకర్ తెలంగాణ స్టేట్ అగ్రికల్చరల్ యూనివర్సిటీకి మరొక ప్రతిష్టాత్మక పురస్కారం లభించింది. వరి సాగులో తడి-పొడి విధానాన్ని అమలుపరిచి రైతులకు అవగాహన కల్పించినందుకు గాను మహీంద్రా అండ్ మహీంద్రా సంస్థ 'సమృద్ధి కృషి శిక్షా సమ్మాన్-2020' పురస్కారాన్ని యూనివర్సిటీకి అందజేసింది. రంగారెడ్డి జిల్లా రాజేంద్రనగర్లో ఉపకులపతి డా. ప్రవీణ్‌రావుకు.. సంస్థ ప్రతినిధి వంశీకృష్ణారెడ్డి అవార్డును అందజేశారు.
అవార్డుతో పాటు ప్రశంసా పత్రం, రూ. 51వేల నగదు ప్రోత్సాహాన్ని.. సంస్థ, యూనివర్సిటీకి అందజేసింది. గత ఏడాది మార్చిలో నిర్వహించాల్సిన ఈ కార్యక్రమం.. కరోనా కారణంగా వాయిదా పడుతూ వచ్చింది.
పురస్కారం అందుకోవడం పట్ల చాలా సంతోషంగా ఉంది. కృషి విజ్ఞాన, ఏరువాక కేంద్రాల ద్వారా రాష్ట్రంలోని పది జిల్లాల రైతులకు అవగాహన కల్పించి.. తడి - పొడి విధానాన్ని అమలుచేశాం. ఈ విధానం వల్ల 4శాతం అదనపు దిగుబడి సాధించాం. 24శాతం నీరు కూడా ఆదా అయింది.
- ఉపకులపతి డా. ప్రవీణ్‌రావు
ఈ కార్యక్రమంలో వర్సిటీ రిజిస్ట్రార్ డా. సుధీర్‌కుమార్, పరిశోధన సంచాలకులు డా. జగదీశ్వర్, ఉన్నతాధికారులు పాల్గొన్నారు.
ఇదీ చదవండి: అ'ధర'హో అంటున్న కంది... ఆనందంలో రైతులు
