రాష్ట్ర వ్యాప్తంగా ఆదివారం రాత్రి 9 గంటలకు ఒకేసారి విద్యుత్ దీపాలు ఆర్పినప్పటికీ, విద్యుత్ శాఖ పక్కా వ్యూహంతో వ్యవహరించడం వల్ల ఎలాంటి ఇబ్బంది తలెత్తలేదని ట్రాన్స్కో, జెన్కో సీఎండీ ప్రభాకర్ రావు పేర్కొన్నారు. ఒకే సారి పెద్దమొత్తంలో విద్యుత్ వినియోగంలో మార్పులు సంభవించినప్పటికీ.. ఉత్పత్తి,సరఫరా మధ్య పూర్తి స్థాయి సమతూకం సాధించడంలో పూర్తిస్థాయిలో విజయం సాధించాయన్నారు. ఆదివారం ఉదయం నుంచి సీఎండీ డి.ప్రభాకర్ రావు విద్యుత్ సౌధలోని లోడ్ డిస్పాచ్ సెంటర్లోనే ఉండి పరిస్థితిని సమీక్షించారు. విద్యుత్ డిమాండ్ ఒకేసారి పడిపోయినప్పుడు అనుసరించాల్సిన వ్యూహం ఖరారు చేశారు. దానికి అనుగుణంగా రాత్రి 9 గంటల నుంచి 9 నిమిషాల పాటు చాకచక్యంగా వ్యవహరించారు.
5,800 మెగావాట్లకు..
విద్యుత్ దీపాలను ఆర్పిన సమయంలో దేశవ్యాప్తంగా విద్యుత్ డిమాండ్ 26వేల మెగావాట్లకు పడిపోయింది. రాష్ట్ర విద్యుత్ డిమాండ్ 9 గంటల ముందు 7,300 మెగావాట్లు ఉండగా.. 9 గంటల తర్వాత 5,800 మెగావాట్లకు పడిపోయింది. ఎస్పీడీసీఎల్ పరిధిలో 1,100 మెగావాట్లు, ఎన్పీడీసీఎల్ పరిధిలో 400 మెగావాట్ల డిమాండ్ పడిపోయింది.
పంపుసెట్లు నడిపి..
తెలంగాణ రాష్ట్రంలో ఒకేసారి లైట్లు ఆర్పేయడం వల్ల 300 నుంచి 500 మెగావాట్ల డిమాండ్ పడిపోయే అవకాశం ఉందని కేంద్ర విద్యుత్ ప్రాధికార సంస్థ అంచనా వేసింది. కానీ రాష్ట్రవ్యాప్తంగా ఒకేసారి లైట్లు ఆర్పేయడం వల్ల 1500 మెగావాట్ల డిమాండ్ పడిపోయింది. పరిస్థితిని క్షణక్షణానికి పర్యవేక్షిస్తూ తగ్గిన లోడ్ను బట్టి మరో చోట అదనంగా విద్యుత్ ఖర్చు చేసే వ్యూహం అనుసరించారు. తగ్గిన డిమాండును బ్యాలెన్స్ చేయడం కోసం నాగార్జున సాగర్ విద్యుత్ ఉత్పత్తి కేంద్రంలో, కాళేశ్వరం ప్రాజెక్టులో పంపుసెట్లు నడిపి విద్యుత్ ఖర్చు చేశారు. థర్మల్ విద్యుత్ కేంద్రాల్లో ఉత్పత్తిని తగ్గించారు. ఫలితంగా విద్యుత్ ఉత్పత్తి, సరఫరాల మధ్య సమతూకం కుదిరింది.
గ్రిడ్పై ఎలాంటి ప్రభావం లేదు..
అటు గ్రిడ్పై ఎలాంటి ప్రభావం కలగలేదు. మరోవైపు 9 గంటల 9 నిమిషాల నుంచి మళ్లీ డిమాండ్ పెరగడం ప్రారంభమైంది. ఇతర చోట్ల వినియోగాన్ని తగ్గించుకుని బ్యాలెన్స్ చేశారు. ఫలితంగా తిరిగి రాష్ట్ర వ్యాప్తంగా ఒకేసారి లైట్లు ఆన్ చేసినా ఎక్కడా ఎలాంటి ఇబ్బంది కలగలేదు.
ఇవీ చూడండి: రాష్ట్రంలో మరో 62 కరోనా పాజిటివ్ కేసులు
