తెలంగాణలో ఈ ఏడాది దీపావళికి భారీగా టపాసులు పేలాయి. గతేడాది పోలిస్తే తగ్గినట్లు గణాంకాలు చెబుతున్నా.. ఈ సంవత్సరం స్వల్పంగా కాలుష్యం పెరిగినట్లు రాష్ట్ర కాలుష్య నియంత్రణ మండలి వెల్లడించింది.
కేంద్ర కాలుష్య నియంత్రణ మండలి ఆదేశాలతో టీఎస్పీసీబీ అధికారులు.. దీపావళి కంటే వారం ముందు కాలుష్య తీవ్రతను లెక్కించారు. ఈ సగటును దీపావళి రోజున నమోదైన గణంకాలతో పోల్చారు. సాధారణ రోజులతో పోలిస్తే స్వచ్ఛమైన గాలిని కలుషితం చేసే అతి సూక్ష్మధూళికణాలు పీఎం 2.5 ఘనపు మీటరు గాలిలో 13 మైక్రోగ్రాములు, సూక్ష్మధూళి కణాలు (పీఎం 10) 9 ఎంజీలు, సల్ఫర్ డై ఆక్సైడ్ 1.6 ఎజీలు, నైట్రోజన్ ఆక్సైడ్ 2.4 ఎంజీలు పెరిగినట్లు తేలింది.
గతేడాది దీపావళితో పోలిస్తే ఈ ఏడాది వాయు కాలుష్యం తగ్గింది. 2019లో పండుగ రోజున పీఎం 2.5 ఘనపు మీటరు గాలిలో 72 ఎంజీలుండగా.. ఈసారి 64 ఎంజీలకు తగ్గింది. పీఎం 10..ఈసారి 128 ఎంజీగానే నమోదైంది. నైట్రోజన్ ఆక్సైడ్ తగ్గింది. సల్ఫర్ డయాక్సైడ్‌ మాత్రం 6 ఎంజీల నుంచి ఈసారి 8.4 ఎంజీలకు పెరిగింది.
శబ్ద కాలుష్యంపై 10 ప్రాంతాల్లో అధ్యయనం చేసిన అధికారులు.. నాలుగు కేటగిరీలు పారిశ్రామిక, సున్నిత, వాణిజ్య, నివాసితగా వర్గీకరించారు. పగటిపూట శబ్ద తీవ్రత నవంబరు 9 తో పోలిస్తే పండగ రోజు తక్కువగా నమోదయింది. రాత్రిపూట నివాసిత ప్రాంతాలు, వాణిజ్య ప్రాంతాల్లో మోత మోగింది. పారిశ్రామిక ప్రాంతాల్లో మార్పు లేనప్పటికీ.. సున్నిత ప్రాంతాల్లో భారీగా తగ్గింది.
