'న్యాయస్థానం నుంచి దేవస్థానం' వరకు పేరిట అమరావతి రైతులు తలపెట్టిన ర్యాలీకి అనుమతి నిరాకరించిన ఆంధ్రప్రదేశ్ పోలీసులు... రాజధాని ప్రాంతంలో తీవ్ర స్థాయిలో ఆంక్షలు పెట్టారు. గతంలో ఎన్నడూ లేని రీతిలో ఏపీ రాజధాని ప్రాంతంలోకి మీడియాకు అనుమతి నిరాకరించారు. చెక్ పోస్టులు ఏర్పాటు చేసి మీడియా ప్రతినిధులను పోలీసులు ఎక్కడికక్కడ నిలిపివేశారు. విజయవాడ నుంచి అమరావతికి వెళ్లే కరకట్ట మార్గంలో 4 చోట్ల చెక్ పోస్టులను పెట్టి మీడియా ప్రతినిధులు రాజధానులోకి వెళ్లకుండా అడ్డగించారు. మీడియా ప్రతినిధులు ఫొటోలు, వీడియోలు తీయనివ్వకుండా పోలీసులు అడ్డుకున్నారు.
ముమ్మర తనిఖీలు
మీడియా ప్రతినిధుల ఫొటోలు తీసుకుని ,వాహనాల నంబర్లను పోలీసులు నమోదు చేసుకున్నారు. రాజధానిలోకి మీడియాను పంపించవద్దని తమకు ఆదేశాలు వచ్చాయని పోలీసులు తెలిపారు. విజయవాడ నుంచి ప్రకాశం బ్యారేజీ మీదుగా రాజధానికి వెళ్లే మార్గంలో అడుగడుగునా ఆంక్షలు విధించారు. ప్రకాశం బ్యారేజీ, సహా కరకట్ట వెంట భారీగా పోలీసులు మొహరించారు. కరకట్టపై నాలుగు చోట్ల చెక్ పోస్టులు ఏర్పాటు చేసిన పోలీసులు.. స్థానికులను మాత్రమే కరకట్ట రహదారిపై అనుమతిస్తున్నారు. ఆధార్ కార్డు లేదా ప్రభుత్వ గుర్తింపు కార్డు ఉంటేనే రాకపోకలకు అనుమతుస్తున్నారు. వాహనాలను పూర్తిగా తనిఖీ చేశాకే అనుమతిస్తున్నారు. పోలీసు ఆంక్షలతో స్థానికులు ఇబ్బందులు పడుతున్నారు.
600 రోజుల ఉద్యమం
రాజధానిని అమరావతినే కొనసాగించాలని రైతులు, మహిళలు చేస్తున్న ఉద్యమం 600 రోజులకు చేరింది. 2019 డిసెంబర్17ని ఏపీ సీఎం జగన్ అసెంబ్లీలో మూడు రాజధానుల ప్రకటన చేసినప్పటి నుంచి నేటి వరకు అమరావతి ఉద్యమం కొనసాగుతోంది. 600ల రోజుకి చేరిన సందర్భంగా రైతులు మహిళలు చేపట్టిన న్యాయస్థానం నుంచి దేవస్థానం ర్యాలీకి పోలీసులు అనుమతులు నిరాకరించారు.
ఎక్కడికక్కడ అడ్డగింత
మరోవైపు విజయవాడ- అమరావతి మార్గంలోనూ అడుగడుగునా ఆంక్షలు అమలు చేస్తున్నారు. ప్రకాశం బ్యారేజీ సహా కరకట్ట వెంట పోలీసులు మోహరించారు. కరకట్టపై 4 చోట్ల చెక్‌పోస్టులు ఏర్పాటు చేశారు. పలు చోట్ల నిరసనలకు దిగిన అమరావతి ఉద్యమకారులు, తెదేపా శ్రేణులను పోలీసులు అడ్డుకున్నారు. తాడేపల్లిలో పలువురు తెదేపా కార్యకర్తలను అరెస్ట్‌ చేశారు. మంగళగిరి లక్ష్మీనరసింహస్వామి ఆలయం వద్ద భారీగా పోలీసులు మోహరించారు. అమరావతి రైతులు ర్యాలీగా వస్తారన్న సమాచారంతో ఆలయం చుట్టు పక్కల ఇనుప కంచె వేసి సమీపంలోకి ఎవరినీ రానివ్వడం లేదు.
బైక్ ర్యాలీ
ఏపీ రాజధాని అమరావతి పరిధిలోని తుళ్లూరు వద్ద ఉద్రిక్తత నెలకొంది. అమరావతి ఐక్యకార్యాచరణ సమితి పిలుపుతో దీక్షా శిబిరం నుంచి మంగళగిరి ఆలయానికి ర్యాలీగా వెళ్లేందుకు సిద్ధమైన రైతులు, మహిళలను పోలీసులు అడ్డుకున్నారు. దీంతో పోలీసులతో వారు వాగ్వాదానికి దిగారు. శాంతియుతంగా నిరసన తెలుపుతుంటే అడ్డుకోవడమేంటని నిలదీశారు. అదే సమయంలో రైతుల బైక్ ర్యాలీని పోలీసులు అడ్డుకునేందుకు యత్నించారు. ఈ క్రమంలో దీక్షా శిబిరంలో ఉన్న మహిళలు, రైతులు హైకోర్టు వైపు పరుగులు తీశారు.
నేతల గృహ నిర్బంధం
అమరావతి ఆందోళనలో పాల్గొంటారన్న సమాచారంతో మందస్తుగానే తెదేపా నేతలను గృహనిర్బంధం చేశారు. ఏపీ మాజీ మంత్రి దేవినేని ఉమా, కొనకళ్ల నారాయణను పోలీసులు గృహనిర్బంధం చేశారు. మరోవైపు తాడేపల్లిలో తెదేపా కార్యకర్తలను పోలీసులు అడ్డుకున్నారు. తాడేపల్లి నుంచి ఏపీ హైకోర్టు వరకు ర్యాలీగా వెళ్లేందుకు యత్నించగా వారిని నిలువరించారు. మరికొందరు తెదేపా కార్యకర్తలు పోలీసు వలయాన్ని ఛేదించుకుని ఉండవల్లి కూడలికి బయల్దేరారు. ఈ క్రమంలో మంగళగిరి మండలం నవులూరులో తెదేపా నేత గంజి చిరంజీవి సహా పలువురు నేతలు, కార్యకర్తలను పోలీసులు అరెస్ట్‌ చేశారు.
నిర్బంధ చర్యలు
రాజధాని అమరావతి ప్రాంతంలోని గ్రామాల్లో పోలీసుల నిర్బంధ చర్యలు కొనసాగుతున్నాయి. అమరావతి ఐక్యకార్యాచరణ సమితి పిలుపు మేరకు హైకోర్టు వద్దకు వెళ్లేందుకు సిద్ధమైన రాజధాని ప్రాంత రైతులు, మహిళలను పోలీసులు ఎక్కడికక్కడ అడ్డుకుంటున్నారు. దీంతో మందడం, వెంకటపాలెంలో ఉద్రిక్తత నెలకొంది. వెంకటపాలెంలో రైతుల ర్యాలీని పోలీసులు అడ్డుకోవడంతో గ్రామస్థులు నిరసన తెలిపారు. గ్రామంలోని రోడ్లను దిగ్బంధించారు. మరోవైపు మందడంలో రైతులు, మహిళలను అడ్డుకోవడంతో పోలీసులతో వారు వాగ్వాదానికి దిగారు. ఈ క్రమంలో పోలీసులు- రైతులు, మహిళల మధ్య స్వల్ప తోపులాట జరిగింది. ఈ క్రమంలో ఆందోళకారులను పోలీసులు అదుపులోకి తీసుకున్నారు. ర్యాలీని అడ్డుకునేందుకు ఏపీ ప్రభుత్వం చేపడుతున్న చర్యలపై మహిళలు, రైతులు తీవ్ర ఆగ్రహం వ్యక్తం చేస్తున్నారు. పోలీసుల చర్యలను నిరసిస్తూ అనంతవరంలో రోడ్డుపై మహిళలు, రైతులు బైఠాయించారు.
ఇదీ చదవండి: RS PRAVEEN KUMAR: నేను హిందువునే... మాతమార్పిడులు అవాస్తవం... అందుకే రాజీనామా చేశా?
