రాష్ట్ర వ్యాప్తంగా రెండు వేల మందికిపైగా సహాయ సిబ్బందిని నియమించేందుకు ఉన్నతాధికారులు కసరత్తు చేస్తున్నారు. ఒప్పంద పద్ధతిలో లేదా టీఎస్‌పీఎస్సీ ద్వారా నియమించనున్నారు. ‘కొత్త సిబ్బంది నియామకానికి సీఎం కూడా సానుకూలత వ్యక్తం చేశారు. వీఆర్వోల స్థానంలో జూనియర్‌ గిర్దావర్‌లను తీసుకుందామని సీఎం తెలిపారు. వీఆర్వో, వీఆర్‌ఏల నుంచి అర్హుల సర్దుబాటు తరువాత కొద్ది రోజుల్లో దీనికి సబంధించిన ప్రక్రియ ప్రారంభించే అవకాశాలున్నాయి’ అని రెవెన్యూశాఖకు చెందిన ఓ ఉన్నతాధికారి తెలిపారు.
వచ్చే మూడు నెలలు రద్దీనే...
వారసత్వ బదిలీ ప్రక్రియను (ఫౌతీ) సులభతరం చేసేందుకు ప్రభుత్వం తీసుకొచ్చిన సంస్కరణల్లో భాగంగా పాసుపుస్తకాల్లో కుటుంబ సభ్యుల పేర్లు చేర్చనున్నారు. రాష్ట్ర వ్యాప్తంగా 61.13 లక్షల వ్యవసాయ ఖాతాలున్నాయి. ఈ ఖాతాలకు చెందిన భూ యజమానుల పాసుపుస్తకాల్లో ఇప్పుడు వారి కుటుంబ సభ్యుల పేర్లు నమోదు చేయాల్సి ఉంది. కొత్త పోర్టల్‌ ధరణిలో ఈ సమాచారం నమోదు చేసి ఆ వివరాలు పాసుపుస్తకంలో అంతర్జాల సహాయంతో ముద్రించనున్నారు.
తహసీల్దారు కార్యాలయాల్లో కుటుంబసభ్యుల వివరాలను యంత్రాంగం నమోదు చేయనుంది. దీనికోసం భూ యజమానులను కార్యాలయాలకు పిలుస్తారా లేదంటే ఆన్‌లైన్‌లో దరఖాస్తు చేసేలా ఐచ్చికం తీసుకొస్తారా అనేదానిపై ఇంకా స్పష్టత రాలేదు. ఏదిఏమైనా వివరాలు తెలుసుకునేందుకు, పాసుపుస్తకంలో పేర్లు నిక్షిప్తం చేసుకునేందుకు భూ యజమానులు కార్యాలయాల ముందు బారులుతీరక తప్పదని రెవెన్యూ వర్గాలు పేర్కొంటున్నాయి.
