తెలంగాణ క్రీడాకారులను ఐపీఎల్లో అంటరాని వారిగా చూస్తున్నారని ఎమ్మెల్యే దానం నాగేందర్ మండిపడ్డారు. జూబ్లీహిల్స్ డివిజన్ గురు బ్రహ్మనగర్లో జరిగిన సంత్ సేవాలాల్ జయంతి ఉత్సవాల్లో పాల్గొన్న దానం... ఐపీఎల్లో జరుగుతున్న అన్యాయాలపై మరోమారు తన గళాన్ని వినిపించారు. తెలంగాణలో ప్రతిభావంతులైన క్రీడాకారులే లేనట్టుగా వ్యవహరిస్తున్నారని ఆవేదన వ్యక్తం చేశారు. సూరత్లో నిర్వహించిన విజయ్ హజారే ట్రోఫీలో ఆడిన ప్రతిభ లేనివారిని ఐపీఎల్కు ఎంపిక చేశారని ఆరోపించారు. హైదరాబాద్ క్రికెట్ అసోసియేషన్ని కొంతమంది కబంధ హస్తాల్లో ఉంచుకొని వారి పిల్లలనే ఎంపిక చేసుకుంటున్నారని విమర్శించారు.
తెలంగాణలోని అద్భుతమైన ప్రతిభ కలిగిన క్రీడాకారులకు సరైన గుర్తింపు రావడం లేదని విచారం వ్యక్తం చేశారు. రాష్ట్రవ్యాప్తంగా ఉన్న క్రీడాకారులను ప్రోత్సహించేందుకు ముఖ్యమంత్రి కేసీఆర్ బడ్జెట్లో వందల కోట్లు కేటాయిస్తారన్నారు. స్థానిక క్రీడాకారులకు గుర్తింపు కోసం ప్రత్యేక చర్యలు తీసుకోవాలని సీఎంకు విజ్ఞప్తి చేశారు. ప్రధానంగా ఐపీఎల్లో మనకు చోటు రాకపోవడానికి మల్టిపుల్ టీమ్స్ కారణమని, దానిని అడ్డుకుంటే తప్ప ప్రతిభకు పట్టం కట్టలేమని అన్నారు. ప్రతిభ కలిగిన క్రీడాకారులకు గుర్తింపు లభించే వరకు పోరాటం కొనసాగుతుందని అన్నారు.
ఇదీ చూడండి: 30 లక్షలు దాటిన తెరాస సభ్యత్వాలు
