హైదరాబాద్ తెలంగాణకు గుండె లాంటిదని మంత్రి నిరంజన్రెడ్డి అన్నారు. దేశంలోనే హైదరాబాద్ని రోల్ మోడల్గా నిలబెట్టింది తెరాస ప్రభుత్వమేనని వెల్లడించారు. అంబర్పేట్లో ఎన్నికల ప్రచారంలో పాల్గొన్న మంత్రి ఆరేళ్లలో కేసీఆర్ ప్రభుత్వం చేసిన అభివృద్ధిని ప్రజలకు వివరించారు.
దేశంలోని మహానగరాలకు, రాష్ట్రాలకు హైదరాబాద్ జంక్షన్ లాంటిది. దేశ అభివృద్ధికి తోడ్పాటులో హైదరాబాద్ పాత్ర కీలకం. తెలంగాణ కోసం ఏమి చేయనోళ్లు ఎగిరెగిరి మాట్లాడుతున్నారు. హైదరాబాద్ అభివృద్ధికి కేంద్రం పట్టుమని 10 పైసలు ఇయ్యలేదు. తెలంగాణ కోసం బరిగీసి నిలబడినప్పుడు నాటి భాజపా ఎమ్మెల్యే కిషన్ రెడ్డి రాజీనామా చేయకుండా తప్పించుకున్నారు. తెలంగాణ సిద్ధాంతకర్త ఆచార్య జయశంకర్ విగ్రహానికి, తెలంగాణ తల్లి విగ్రహానికి ఏనాడు దండేసి దండం పెట్టింది లేదు. తెలంగాణ ఉద్యమంలో అసువులు బాసిన అమరులకు ఒక్కనాడు కూడా ఈ విపక్ష పార్టీల నేతలు నిండు మనసుతో నివాళులు అర్పించలేదు. ఇలాంటివారు ఇప్పుడు అవకాశం ఇస్తే ఏదో చేస్తామని అబద్దాలు చెబుతున్నారు. - నిరంజన్రెడ్డి, వ్యవసాయ శాఖ మంత్రి.
ఆరేళ్లలో ఆరోగ్య తెలంగాణ నిర్మాణం కోసం ఎన్నో ప్రణాళికలు, నిర్ణయాలు తీసుకున్నామని మంత్రి నిరంజన్రెడ్డి వివరించారు. కోటికి పైగా జనం ఉన్న నగరంలో నిరంతర విద్యుత్ సరఫరా చేస్తున్నామని పునరుద్ఘాటించారు. ఐటీలో నంబర్ వన్గా, నిర్మాణ రంగంలో అగ్రస్థానంలో నిలబడ్డామని గుర్తు చేశారు. కరోనా వచ్చినా, వరదలు వచ్చినా హైదరాబాద్లో గల్లీ గల్లీ తిరిగింది తెరాస మంత్రులు, ఎమ్మెల్యేలు, కార్పొరేటర్లు, నేతలు మాత్రమేనని చెప్పుకొచ్చారు. నిలిపేసిన వరదసాయాన్ని డిసెంబరు 4 తర్వాత ప్రతి ఒక్కరికి అందిస్తామని హామీ ఇచ్చారు.
ఇవీ చూడండి: గ్రేటర్ బస్తీలో ప్రచారం ముమ్మరం... పోటీ రసవత్తరం
