కరోనా నేపథ్యంలో స్వగ్రామాలకు చేరుకునేందుకు 3 రోజులుగా నడిచి వస్తున్న వలస కూలీలను పోలీసులు అడ్డుకున్నారు. వారిని వెంటనే మినీ వాహనంలో తిరిగి వారు బయలు దేరిన చోటుకు తరలించారు. కూలీ పనుల కోసం ఏపీలోని గుంటూరు జిల్లాకు వచ్చిన వలసకూలీలు లాక్‌డౌన్‌ నేపథ్యంలో తాడికొండ మండలం రావెలలో చిక్కుకుపోయారు.
వీరంతా నంద్యాలకు వెళ్లడానికి వంట సామగ్రి సహా మూడురోజుల క్రితం బయల్దేరారు. తిప్పలు పడి బుధవారం గుంటూరు జిల్లా సరిహద్దు లక్ష్మీపురం చెక్‌పోస్టు వద్దకు చేరుకోగానే అక్కడ విధులు నిర్వహిస్తున్న మహిళా ఎస్సై వారిపై ఆగ్రహం వ్యక్తం చేశారు. ఎక్కడి నుంచి వచ్చారో అక్కడికే తిరిగి వెళ్లాలని ఆదేశించారు.
మూడు రోజుల నుంచి నడిచి వస్తున్నాం.. మా ఊరుకు పంపండి అని వేడుకున్నారు. ఊరిలో ఉన్న పిల్లలు ఏడుస్తున్నారు.. తిండిలేక అల్లాడుతున్నారని వాపోయినా వినిపించుకోలేదు. అక్కడే ఉన్న ఓ వాహనంలో తక్షణమే వెనక్కు పంపారు. చివరకు వలస కూలీల నుంచే వాహనానికి డబ్బులు ఇప్పించి ఓ కానిస్టేబుల్‌ను, స్థానిక వైకాపా కార్యకర్తను ఇచ్చి రావెల గ్రామానికి పంపారు.
ఇవీచూడండి: ఇంటిపట్టున ఉండు.. విజ్ఞానం చేతపట్టు!
