తిరుమల శ్రీవారిని లోక్సభ స్పీకర్ ఓం బిర్లా దర్శించుకున్నారు. వీఐపీ ప్రారంభ దర్శన సమయంలో కుటుంబ సభ్యులతో కలిసి ఆలయం వద్దకు చేరుకున్న స్పీకర్కు తితిదే ధర్మకర్తల మండలి అధ్యక్షులు వైవీ.సుబ్బారెడ్డి ఇతర అధికారులు కలిసి స్వాగతం పలికారు. శ్రీవారి మూలమూర్తిని దర్శించుకున్న ఆనంతరం రంగనాయకుల మండపంలో పండితులు వేదాశీర్వచనం చేయగా... తితిదే ఛైర్మన్.. స్పీకర్ను శేషవస్త్రంతో సత్కరించి తీర్థప్రసాదాలను అందజేశారు. వారి వెంట రాజ్యసభ ఎంపీ విజయసాయి రెడ్డి ఉన్నారు.
పద్మావతి అమ్మవారి సేవలో..
దేశం క్షేమంగా ఉండాలని.. ప్రతి ఒక్కరూ ఆయురారోగ్యాలతో ఉండాలని శ్రీ పద్మావతి అమ్మవారిని కోరుకున్నట్లు లోక్సభ స్పీకర్ ఓం బిర్లా తెలిపారు. తిరుమల శ్రీవారి దర్శనార్ధం తిరుపతికి వచ్చిన ఆయన.. తొలుత తిరుచానూరు శ్రీ పద్మావతి అమ్మవారిని కుటుంబ సమేతంగా దర్శించుకున్నారు. ఆ తరువాత శ్రీనివాసమంగాపురంలోని శ్రీ కల్యాణ వేంకటేశ్వరస్వామిని దర్శించుకున్నారు.
ప్రత్యేక విమానంలో రేణిగుంట విమానాశ్రయానికి వచ్చిన ఆయన రోడ్డు మార్గంలో తిరుచానూరు అమ్మవారి ఆలయానికి చేరుకున్నారు. ఆలయం వద్ద తితిదే ఛైర్మన్ వై.వీ.సుబ్బారెడ్డి, ఎంపీలు విజయసాయి రెడ్డి, మిథున్ రెడ్డి, అర్చకులు ఆలయ మర్యాదలతో స్వాగతం పలికారు. ప్రత్యేకపూజలు నిర్వహించి అమ్మవారిని దర్శించుకున్నారు. దర్శనానంతరం అధికారులు తీర్థప్రసాదాలు అందజేశారు.
ఇదీ చదవండి: CBI: ఆ కేసులో మంత్రి సబితా ఇంద్రారెడ్డిపై కీలక ఆధారాలున్నాయి
