కృష్ణా జిల్లా తిరువూరు సమీపంలోని అంతర్‌రాష్ట్ర చెక్‌పోస్టును జిల్లా ఎస్పీ రవీంద్రనాథ్ బాబు తనిఖీ చేశారు. స్థానికంగా లాక్డౌన్ అమలవుతున్న తీరును పరిశీలించారు. వివిధ సేవాసంస్థలు సమకూర్చిన మాస్కులు, శానిటైజర్స్, కూరగాయలు, నిత్యావసరాలను పంపిణీ చేశారు. కరోనా కేసుల నమోదును పరిగణనలోకి తీసుకుని.. కృష్ణాజిల్లాలో ఐదు ప్రాంతాలను రెడ్‌జోన్లుగా ప్రకటించామని తెలిపారు. ప్రజలు నిర్దేశించిన సమయంలో మాత్రమే బయటకు వస్తూ... తమ పనులు పూర్తైన తర్వాత ఇళ్లకే పరిమితమవుతున్నారని చెప్పారు. మైలవరం పోలీస్‌స్టేషన్‌ను సందర్శించిన ఎస్పీ.. పోలీసులకు, పాత్రికేయులకు నిత్యావసరాలు అందించారు.
కడపజిల్లా రైల్వేకోడూరు సమీపంలో ప్రభుత్వ విప్‌ శ్రీనివాసులు పర్యటించారు. శాంతినగర్, రంగనాయకులపేట వీధుల్లో వైకాపా నేతలతో కలసి పారిశుద్ధ్య పనులను పరిశీలించారు. స్థానిక పంచాయతీ అధికారులతో మాట్లాడారు. రైల్వేకోడూరు పట్టణమంతా పరిశుభ్రంగా ఉంచాలని క్రిమిసంహారక మందులను పిచికారీ చేయాలని సూచించారు. పారిశుద్ధ్య కార్మికులతో పాటు వీధివీధి తిరిగి బ్లీచింగ్ పౌడర్‌ను పిచికారీ చేశారు. కడప నగరంలోని అలంఖాన్‌పల్లెలో పశువులకు వింతవ్యాధి ప్రబలింది. స్థానిక గోశాలలో ఉన్న ఆవులకు చర్మ సంబంధమైన వ్యాధి సోకడంతో నిర్వాహకులు ఆందోళన వ్యక్తం చేశారు. పశువుల శరీరంపై నల్లగా మచ్చలు రావడం... వాటి ద్వారా రక్తం బయటికి వస్తోందని తెలిపారు. పశువులను పరీక్షించిన వైద్యులు.. వీటికి "లంపీ" చర్మవ్యాధి లక్షణాలు ఉన్నట్లు గుర్తించారు.
కర్నూలులో లాక్డౌన్ ప్రశాంతంగా కొనసాగుతోంది. నగరంలోని వీధుల్లో నగరపాలక సంస్థ ఆధ్వర్యంలో క్రిమి సంహారక మందును పిచికారీ చేస్తున్నారు. లాక్డౌన్ సందర్భంగా విధులు నిర్వహిస్తున్న పోలీసు సిబ్బందికి.. రామకృష్ణ అనే వ్యక్తి భోజనం ప్యాకెట్లు అందించారు. కార్యక్రమంలో ఓఎస్‌డీ రామాంజనేయులు, ట్రాఫిక్ డీఎస్పీ పాల్గొన్నారు. లాక్డౌన్ నేపథ్యంలో నెల్లూరు జిల్లా సరిహద్దు ప్రాంతాన్ని జిల్లా ఎస్పీ భాస్కర్ భూషణ్... ఆకస్మికంగా తనిఖీ చేశారు. తమిళనాడు-నెల్లూరు సరిహద్దు ప్రాంతమైన తడ చెక్‌పోస్టు వద్ద డ్రోన్‌ కెమెరాను స్వయంగా ఆపరేట్‌ చేసి.. పరిస్థితి పరిశీలించారు. నిత్యావసరాలు, అత్యవసర వాహనాలకు తప్ప ఎలాంటి వాహనాలకు అనుమతి లేదని ఎస్పీ తెలిపారు. వలస కార్మికులకు భోజన ప్యాకెట్లు, మాస్కులు పంపిణీ చేశారు.
విశాఖలోని రెడ్‌జోన్‌ ప్రాంతంగా ప్రకటించిన అక్కయ్యపాలెంలో పూర్తి లాక్డౌన్ కోసం పోలీసులు భారీగా మోహరించారు. ఆ ప్రాంతం నుంచి ఎక్కువ కేసులు నమోదు కావటంతో పూర్తిగా దిగ్బంధనం చేయాలని నిర్ణయించారు. అక్కయ్యపాలెం నుంచి తాటిచెట్లపాలెం సహా, రైల్వే న్యూకాలనీకి వెళ్లే అన్ని మార్గాలూ మూసివేయనున్నారు. స్థానికులు బయటకు రాకుండా... ఇతరులు లోపలికి ప్రవేశించకుండా చర్యలు తీసుకుంటున్నారు.
ఇదీ చదవండి: కన్నబిడ్డను తాకలేక తల్లడిల్లిన తల్లి!
