తెలంగాణ కాంగ్రెస్లో రాజకీయ వేడి రాజుకుంది. హస్తం ముఖ్య నేతల మధ్య విభేదాలు తారాస్థాయికి చేరాయి. పార్టీ పరువు బజారున పడుతోందని తెలిసినా... వ్యక్తిగత ప్రయోజనాలకే మొగ్గు చూపుతున్నారు. ముఖ్యనేతల మధ్య ఆధిపత్య పోరు పార్టీ ప్రయోజనాలను దెబ్బతీస్తోంది. ప్రతిపక్ష పార్టీగా సర్కార్ వైఫల్యాలను ఎండగట్టాల్సిన నేతలు.. సొంత పార్టీ నాయకుల తప్పులను వెతికే పనిలో పడ్డారు. పైచేయి సాధించేందుకు ఎత్తులు, పైఎత్తులతో ముందుకు వెళ్తున్నారు.
రేవంత్ దూకుడును తప్పుగా..
తెలంగాణ కాంగ్రెస్ రాజకీయాలు ఎంపీ రేవంత్ రెడ్డి చుట్టే తిరుగుతున్నాయి. రేవంత్ దూకుడుతనాన్ని సీనియర్లు తప్పుబడుతున్నారు. గోపన్పల్లి భూముల వ్యవహారంలో రేవంత్ రెడ్డికి వ్యతిరేకంగా ప్రచురితమైన.. వార్తల్ని హైకమాండ్కి నివేదించారు. సొంత పార్టీ వర్కింగ్ ప్రెసిడెంట్పై వచ్చిన ఆరోపణలు ఖండించి మద్దతుగా నిలువాల్సిన నేతలు.. అధికార పార్టీ వర్కింగ్ ప్రెసిడెంట్కు అనుకూలంగా మాట్లాడుతున్నారు.
కేటీఆర్ కట్టుకుంటే తప్పేంటి..
111 జీవో పరిధిలో కేటీఆర్ నిబంధనలను ఉల్లంఘించి 25 ఎకరాల్లో ఫామ్ హౌస్ నిర్మించుకున్నారని ఆరోపిస్తూ రేవంత్ రెడ్డి ఇటీవల మీడియాని జన్వాడ వద్దకి తీసుకెళ్లారు. ఈ విషయాన్ని తప్పుబట్టారు హస్తం అగ్రనేతలు. 111 జీవో పరిధిలో కేటీఆర్ ఒక్కరే భవన నిర్మాణం చేయలేదని, అక్కడ చాలా మంది పెద్ద పెద్ద భవంతులు కట్టుకున్నారని.. అలాంటప్పుడు కేటీఆర్ కట్టుకుంటే తప్పేంటన్న తీరులో నాయకులు మాట్లాడడం కాంగ్రెస్ పార్టీలో చర్చనీయాంశంగా మారింది.
అరెస్ట్పై అంతర్గత రాజకీయం..
అనుమతి లేకుండా డ్రోన్ కెమెరాలు ఉపయోగించి ఫొటోలు తీశారన్న ఆరోపణలతో రేవంత్ రెడ్డిని పోలీసులు ఇటీవల అరెస్ట్ చేశారు. వ్యవహారాన్ని ఖండిస్తూ రాజ్యసభ ప్రతిపక్ష నేత గులాం నబీ ఆజాద్ లేఖ విడుదల చేశారు. దీన్ని కూడా కొందరు నేతలు తప్పుబడుతున్నారు. రేవంత్ తన సొంత ఎజెండాతో పనిచేస్తున్నారని ఆరోపించారు. అయితే... సర్కార్పై చేసే పోరాటం ఎలా వ్యక్తిగతం అవుతుందని రేవంత్ వర్గీయులు ప్రశ్నిస్తున్నారు.
ఎవరి వాదన వారిదే..
అరెస్ట్ వ్యవహారాన్ని రాజకీయంగా వాడుకొని అధికార పార్టీపై దూకుడు పెంచాల్సిన సీనియర్ నేతలు రేవంత్ రెడ్డిని లక్ష్యం చేయడం ఏంటని ఎంపీ వర్గీయులు మండిపడుతున్నారు. మరోవైపు ముఖ్య నేతలు ఎవరికి వారు తమ వాదనని సమర్ధించుకునే ప్రయత్నం చేస్తున్నారు. అధికార పార్టీపై పోరాటాన్ని పక్కనపెట్టి సొంత పార్టీలో ఒకరిపై ఒకరు దుమ్మెత్తడం పార్టీ శ్రేణుల్ని అయోమయంలోకి నెడుతోంది.
ఇవీ చూడండి: 'ఛలో అసెంబ్లీ' ఉద్రిక్తం... ఉపాధ్యాయ నేతల అరెస్ట్
