నిజం చెప్పండి. జీవితంలో ఎంతమందిని ప్రేమతో.. ఇష్టంతో చూసుంటారు. ప్రతి ఒక్కరూ ఏదో ఒక చోట దొంగ చూపు చూసినవారే. మేం చాలా డిసెంట్ బాబు అనే వాళ్లు కూడా.. ఏదో ఒక అంశంపై దృష్టి పెట్టి.. మీ కళ్లను బానిసలు చేసినవారే. ఎందుకంటే చూపునకు అంత మహాత్యం. చూపులు క్షణాలే అయినా.. మనసులో జీవితాంతం ఉండిపోతాయి. అవతలి వారి చూపే.. వారిపై మన అభిప్రాయం.
పాఠశాల నుంచి మెుదలయ్యే.. ఈ చూపుల కలయిక మనిషి చనిపోయేంత వరకూ ఉంటుంది. అది కాలేజీ కావొచ్చు.. పనిచేసే ఆఫీస్ కావొచ్చు. మీరు నడుస్తున్న ఫుట్ పాత్.. మీరు ఎక్కిన బస్సు, చివరకు మీ పక్కింటి బాల్కానీ. మనిషి చూపులో పవర్ ఉంటుంది. మనిషిని అంచనా వేసేందుకు.. ప్రేమను చూపేందుకు చూపులు చాలా రకాలుగా ఉంటాయండి.
మనం రోజూ.. చూస్తాం కాబట్టి పట్టించుకోం. చూపులను మనం ఒకలా చూస్తే.. సైకాలజిస్టు మరోలా చూస్తారు. చూపుల కలయికపై చాలా కాలంగా పరిశోధనలు జరుగుతున్నాయి. అయితే ఈ చూపుల ప్రభావమెంత అని తెలుసుకునేందుకు ఓ ప్రయోగం జరిగింది. ఒక వ్యక్తి ముఖం మాత్రమే కనిపించేలా కెమెరా సెట్ చేశారు. ఆ వీడియోలోని వ్యక్తి కళ్లను చూసే పని కొంతమందికి అప్పజెప్పారు.
ఈ ప్రయోగంలో.. వీడియోలోని వ్యక్తి కళ్లను చూసే వారిని ప్రశ్నలు అడిగారు. మనం రోజు చూసే.. పనులను అడిగితేనే చెప్పడానికి చాలా సమయం తీసుకున్నారట. తెలిసిన వాళ్ల కళ్లలోకి చూసి మాట్లాడేందుకే మనకు ఏదో భయం. అలాంటి తెలియని వ్యక్తితో మాట్లాడితే.. మెదడు పనితీరుపై ప్రభావం ఉంటుంది. నేరుగా ఇద్దరు వ్యక్తులను ఎదురెదురుగా ఉంచిన ఇదే ఫలితం.
అవతలి వ్యక్తి మనవైపు చూస్తున్నారని తెలిసినపుడు మనం మెలికలు తిరిగిపోతాం. మాట్లాడే మాట, చేసే పని, అన్నింటిలో జాగ్రత్తలుంటాయి. మన ఏకాగ్రత అటువైపే వెళ్తుంది. ఎవరు చూస్తే మనకేంటి అనుకునేవారు కూడా జాగ్రత్త పడతారు. మనపై ఇష్టం లేని వారి వైపు చూసి.. ఇబ్బందిపెడితే.. అది క్రమంగా అసూయ, ద్వేషంగా మారే అవకాశం ఉంది.
ఇలాంటి చూపుల కలయిక సగటున మూడు సెకన్లు ఉంటుందని పరిశోధకులు తేల్చారు. 9 సెకన్ల కంటే ఎక్కువసేపు అలా చూపులు కలపడానికి ఇష్టపడరనీ గుర్తించారు. ఒకవేళ మీకు ఇలాంటి చూపుల గోల ఎదురైతే.. కాసేపు చూపు తిప్పుకుంటే సరి.. మళ్లీ పనిపై ఏకాగ్రత వచ్చేస్తుంది.
ఇదీ చూడండి: 'పాప ఓ పాప' వచ్చేసింది- 'మిషన్ మజ్ను' షూటింగ్లో రష్మిక
